მუშების პროტესტის შედეგი – 19 მათგანს სამსახურიც დაატოვებინეს და ღამისგასათევიც [Photo]

იხილეთ გასალების ამსახველი ფოტომასალა:













შეგახსენებთ, ვალეში, იქ სადაც, სამხრეთ კავკასიური გაზსადენის გაფართოების პროექტის ფარგლებში, სამშენებლო სამუშაოები მიმდინარეობს, საპროტესტო აქცია დღეს, 2 დეკემბერს, დილიდან დაიწყო. მუშებმა პროტესტის ნიშნად სამუშაოები არ შეასრულეს და გადაკეტეს ადმინისტრაციის ოფისამდე მისასვლელი გზა. მუშების მოთხოოვნაა გაუზარდონ შემცირებული საათები, რის გამოც მათი ხელფასი 600–დან 400 ლარამდე შემცირდა, დაუმატონ ანაზღაურება შაბათ–კვირას მუშაობისთვის, ან ამ დღეებში დაასვენონ და გააუმჯობესონ მათი კვებითი მენიუ.

აქციის დროს მუშებს განუცხადეს, რომ თბილისიდან, რუსთავიდან და მარნეულიდან გადმოყვანილი 30 თანამშრომელი სამსახურიდანაა გაშვებული. თუმცა, მოგვიანებით რამდენიმე მათგანს უთხრეს, რომ სამსახურში აღადგინეს.

აქციის მონაწილეები შუამდგომლობას სთხოვდნენ სამცხე–ჯავახეთის გუბერნატორს, თუმცა, აქცია ისე დასრულდა, რომ გუბერნიიდან მათთან არავინ მივიდა.

ხელისუფლებიდან აქციის მონაწილეებთან მხოლოდ ახალციხის მუნიციპალიტეტის გამგებლის წარმომადგენელი ვალის ტერიტორიულ ორგანოში, ელიოზ ბარბლიშვილი მივიდა.

„ჩავაყენებთ საქმის კურსში ადგილობრივ თვითმმართველობას, სავარაუდოდ, შევხვდებით კომპანიის ხელმძღვანელობასაც“, – განაცხადა ბარბლიშვილმა.

მუშებთან მივიდა საპარლამენტო უმცირესობის წევრი, ახალციხის მაჟორიტარი დეპუტატი „ერთიანი ნაციონალური მოძრაობიდან“ ვაჟა ჩიტაშვილიც. დეპუტატი გაფიცულებს მხარდაჭერას უცხადებს და ამბობს, რომ საჭიროების შემთხვევაში დაეხმარება გათავისუფლებულებს სამართლებრივი დავის წამოწყებაში.

აქციის მონაწილეებს კოცონი ჰქონდათ დანთებული, შიმშილის მოსაკლავად, ახლომდებაზე ნაკვეთიდან კარტოფილი ამოყარეს და შეწვეს.

აქციის მონაწილეებმა გააკეტეს გზა და არ გაატარეს მანქანა, რომელსაც ადმინისტრაციისთვის განკუთვნილი საჭმელი ჰქონდა. მანქანა ჯერ უკან გაბრუნდა, მოგვაინებით ისევ მივიდა და გაწევ–გამოწევისა და მსჯელობის შემდეგ, შეუშვეს. როგორც გაფიცულები ამბობენ, მათ უთხრეს, "რომ თუ მანქანას არ შეუშვებდნენ, მთელი სამხარეო სამმართველო ავიდოდა".

საპროტესტო აქცია დაახლოებით 15:00 საათზე დასრულდა. აქციის მონაწილეები იმ პირობით დაიშალნენ, რომ ხვალ ისევ შეიკრიბებიან.

მოგვიანებით, საღამოს საათებში, სასტუმრო "თეთრ სახლში" რომელიც კომპანიას აქვს დაქირავებული, დაცვის პოლიციის თანამშრომლები შეიკრიბნენ. მათ გათავისუფლებულებს სასტუმროს დატოვება მოსთხოვეს.

"სად წავიდეთ, არც ფული გვაქვს და არც ღამისგასათევი", – ამბობდნენ გათავისუფლებულები, თუმცა, უშედეგოდ. დაახლოებით 20:00 საატზე 19–მა გათავისუფლებულმა სასტუმროში დაკავებული ოთახები დაცალა და მიკროავტობუსით გარადაბანში გაემგზავრა.

[ვარლამ წიკლაური, ნინო ნარიმანიშვილი, ახალციხე]