ვალეში მუშების საპროტესტო აქცია გრძელდება

ვალეში, იქ სადაც გაზსადენის გაფართოების პროექტის ფარგლებში საცხოვრებლების მშენებლობა მიმდინარეობს, დღეს, 3 დეკემბერს დილიდან 100-მდე მუშაა შეკრებილი. მუშები პროტესტს აგრძელებენ და ამბობენ, რომ ვიდრე მათი მოთხოვნები არ დაკმაყოფილდება აქციებს არ შეწყვეტენ.

შეგახსენებთ, რომ ვალეში სამხრეთ კავკასიური გაზსადენის გაფართოების სამუშაოებზე დასაქმებულმა მუშებმა აქცია გუშინ, 2 დეკემბერს დილიდან დაიწყეს. აქცია 15:00 საათამდე გაგრძელდა. გაფიცულები ითხოვენ გაუზარდონ შემცირებული საათები, რის გამოც მათი ხელფასი 600–დან 400 ლარამდე შემცირდა, დაუმატონ ანაზღაურება შაბათ–კვირას მუშაობისთვის, ან ამ დღეებში დაასვენონ და გააუმჯობესონ მათი კვებითი მენიუ.

გუშინვე, კომპანიის დასაქმების სამსახურის ხელმძღვანელმა 30 მუშას უთხრა, რომ სამსახურიდან გაათავისუფლეს. აქცია შუადღეს ისე დასრულდა, რომ მუშებთან არავინ გამოსულა.

საღამოს უფროსთან სასაუბროდ გათავისუფლებულები შევიდნენ. რაზე ისაუბრეს უცნობია, თუმცა, საღამოს, 30–დან 19–ს აცნობეს, რომ სამსახურში აღარ აღადგენდნენ და დაცვის პოლიციის დახმარებით ის სასტუმროც დაატოვებინეს, სადაც ღამეს ათევდნენ. სასტუმრო კომპანიას აქვს დაქირავებული.

[ვარლამ წიკლაური, თინათინ ზაზაძე, ახალციხე]