ვალეში გაფიცულ მუშებთან ვაჟა ჩიტაშვილი მივიდა [Photo]

ამ წუთებში ვაჟა ჩიტაშვილი გაფიცულ მუშებს ხვდება და მათ მოთხოვნებს ისმენს.

„მათ აქვთ მშვიდობიანი აქციის გამართვის უფლება კანონის ფარგლებში. გათავისუფლებულ 30 ადამიანს დავეხმარებით, რომ სასამართლოში სარჩელი შეიტანონ“, – ამბობს ვაჟა ჩიტაშვილი.

ვაჟა ჩიტაშვილი მუშებს დაჰპირდა, რომ შეეცდება მათ ხელმძღვანელობას შეხვდეს: "30 ადამიანის გათავისუფლება აზრის გამოხატვის გამო, უკანონობაა. შაბათ–კვირას თუ ამუშავებენ, ეკუთვნით დანამატები. მე მხარს ვუჭერ და სოლიდარობას ვუცხადებ. დღეს არ ეხალისებათ აქ დგომა".

„აქ ვაპირებთ გათენებას. საბურავებს დავანთებთ, ვითხოვთ კარავის დადგმის უფლება მოგვცენ. ნუ ჩაერევიან სახელმწიფო სტრუქტურები. ჩვენი მოთხოვნები უცვლელია“, – აცხადებენ გაფიცულები.

ვაჟა ჩიტაშვილთან ერთად გაფიცულებთან იმყოფება გამგებლის წარმომადგენელი ვალის ტერიტორიულ ორგანოში ელიოზ ბარბლიშვილი:„ჩავაყენებთ საქმის კურსში ადგილობრივ თვითმმართველობას, სავარაუდოდ, შევხვდებით კომპანიის ხელმძღვანელობასაც“.

აქცაზე მივიდა საპარტულო პოლიციის ერთი ეკიპაჟიც. ასევე, რაიონული პოლიციის უფროსი. სამართალდამცავები აცხადებენ, რომ წესრიგის დასაცავად მივიდნენ.

შეგახსენებთ, დღეს დილის 09:00 საათიდან, ვალეში 200-მდე მუშაა გაფიცული. ისინი სამუშაო პირობებს, კვებასა და ხელფასის დაკლებას აპროტესტებენ და აცხადებენ, რომ ვიდრე მათ მოთხოვნებს არ მოისმენენ და პასუხს არ გასცემენ, აქციას არ შეწყვეტენ.

მეტიც, გაფიცულები ვალეს საბაჟოსკენ მიმავალი გზის გადაკეტვით იმუქრებიან. ახლა მათ ადმინისტრაციის ოფისამდე მისასვლელი გზა აქვთ გადაკეტილი. არ გაატარეს ერთ-ერთი უფროსის მანქანაც. მუშების ინფორმაციით, გაფიცულებიდან 30 ადამიანი მშენებელმა კომპანიამ სამსახურიდან გაუშვა.

გაფიცულებმა გასათბობად ცეცხლი დაანთეს და ამბობენ, რომ არ დაიშლებიან, ვიდრე მათი მოთხოვნები არ დაკმაყოფილდება.











[ვარლამ წილაური, თინათინ ზაზაძე, ახალციხე]