ვალეში გაფიცულებმა უფროსი არ გაატარეს გზაზე [Photo]

შეგახსენებთ, დღეს დილის 09:00 საათიდან, ვალეში, სამხრეთ-კავკასიური გაზსადენის გაფართოების პროექტზე დასაქმებული 200-მდე მუშაა გაფიცული.

აქციის მონაწილეები სამუშაო პირობებს, კვებასა და სამუშაო საათების დაკლებას აპროტესტებენ და აცხადებენ, რომ ვიდრე მათ მოთხოვნებს არ მოისმენენ და პასუხს არ გასცემენ, აქციას არ შეწყვეტენ. მეტიც, გაფიცულები ვალეს საბაჟოსკენ მიმავალი გზის გადაკეტვით იმუქრებიან.

მუშები ამბობენ, რომ მათ არ აძლევენ საკვებს, მუშაობენ მონურ პირობებში და იმის გამო, რომ შეუმცირეს სამუშაო საათები, ანაზრაურება 600–დან 400 ლარამდე შეუმცირდათ.

ამ დროისთვის აქციის მონაწილეებს ადმინისტრაციის ოფისთან მისასვლელი გზა აქვთ გადაკეტილი. ამბობენ, რომ ახლა ხელმძღვანელობის კვების დროა და მათთან საჭმლის მომტან მანქანებს არ მიუშვებენ.

გაფიცულები ითხოვენ მათი პრობლემების მოგვარებაში ადგილობრივი ხელისუფლება ჩაერთოს და უშუამდგომლონ მშენებელ კომპანია "ბეხტელ & ენკა"-სთან.

[ვარლამ წიკლაური, ნინო ნარიმანიშვილი, ახალციხე]