ვალეში გაფიცული მუშები მოლაპარაკებას დათანხმდნენ

ვალეში სამხრეთ კავკასიური გაზსადენის გაფართოების სამუშაოებზე დასაქმებული მუშები, რომლებიც ორი დღეა აქციებს აწყობენ, კომპანიის წარმომადგენლის ადამიანური რესურსების სპეციალისტის ილია ბეჟაშვილის შემოთავაზებას დათანხმდნენ. აქციის მონაწილეები დამსაქმებლებისგან პასუხს ელოდებიან და მათი მოთხოვნების შესრულებას ითხოვენ.

შეგახსენებთ, რომ ვალეში სამხრეთ კავკასიური გაზსადენის გაფართოების სამუშაოებზე დასაქმებულმა მუშებმა აქცია გუშინ, 2 დეკემბერს დილიდან დაიწყეს. გაფიცულები ითხოვენ გაუზარდონ შემცირებული საათები, რის გამოც მათი ხელფასი 600–დან 400 ლარამდე შემცირდა, დაუმატონ ანაზღაურება შაბათ–კვირას მუშაობისთვის, ან ამ დღეებში დაასვენონ და გააუმჯობესონ მათი კვებითი მენიუ.

გუშინვე, კომპანიის დასაქმების სამსახურის ხელმძღვანელმა 30 მუშას უთხრა, რომ სამსახურიდან გაათავისუფლეს. აქცია შუადღეს ისე დასრულდა, რომ მუშებთან არავინ გამოსულა. საღამოს უფროსთან სასაუბროდ გათავისუფლებულები შევიდნენ. რაზე ისაუბრეს უცნობია, თუმცა, საღამოს, 30–დან 19–ს აცნობეს, რომ სამსახურში აღარ აღადგენდნენ და დაცვის პოლიციის დახმარებით ის სასტუმროც დაატოვებინეს, სადაც ღამეს ათევდნენ. სასტუმრო კომპანიას აქვს დაქირავებული.

მუშებს კომპანიის შესასვლელთან გზა აქვთ გადაკეტილი და საკვებით,საწვავით და ბეტონით დატვირთულ მანქანებს არ ატარებენ.
ადგილზე მობილიზებულია პოლიცია.

[ვარლამ წიკლაური თინათინ ზაზაძე, ახალციხე]