ასპინძის საავადმყოფოს ექიმებმა შპს „ადითს“ სასამართლო მოუგეს

შპს "ადითი" ასპინძის საავადმყოფოს 2011 წლის მარტიდან 2013 წლის სექტემბრამდე ფლობდა. მას მერე, რაც ჯანდაცვის სამინისტროს გადაწყვეტილებით, "ადითს" საავადმყოფოები ჩამოერთვა,სამედიცინო ცენტრს შპს „რეგიონული ჯანდაცვის ცენტრი“ განკარგავს.

"ადითი" ასპინძიდან ისე გავიდა, მედპერსონალის სახელფასო დავალიანება არ დაუფარავს. ამიტომ, ექიმებმა სასამართლოს მიმართეს და პროცესი მოიგეს.

სამედიცინო ცენტრის ხელმძღვანელის მანანა ცინაძის განმარტებით, „ადითს“ მედპერსონალისთვის 90.000-ლარამდე დავალიანება აქვს გადასახდელი.

მოსარჩელე მხარის ადვოკატი, ოთარ გოგოლაძე ამბობს, რომ მათი საჩივარი დაკმაყოფილებულია და ამ ეტაპზე გადაწყვეტილების მიღებას ელოდებიან: „თუ არ გასაჩივრდა, აღსრულებისთვის ვიბრძოლებთ“.

მისივე თქმით, ვიდრე სასამართლო გადაწყვეტილებას მიიღებდა, თავისი ინიციატივით ლევან სამხარაულის სახელობის საბუღალტრო-საფინანსო ექსპერტიზაც დანიშნა. თუმცა, იმის გამო, რომ მოპასუხე მხარემ საჭირო დოკუმენტები არ წარუდგინა, გაკეთდა აქტი ექსპერტიზის გაცემის შეუძლებლობის შესახებ.

„ადითმა“ სამედიცინო საქმიანობისთვის ლიცენზია 2011 წლის მაისიდან მიიღო. კომპანიის ბენეფიციართა 90% სახელმწიფო სადაზღვევო პროგრამებით მოსარგებლე მოსახლეობა იყო. „ადითში“ განმარტავენ, რომ პაციენტთა სამედიცინო მომსახურების საფასური სადაზღვევო კომპანიებს უნდა დაეფარათ. 2012 წლის ბოლოდან კი სადაზღვევოების უმრავლესობამ თანხების ანაზღაურება შეაჩერა, რამაც კომპანიას საფრთხე შეუქმნა. დღეის მდგომარეობით, „ადითის“ დავალიანება, 1,5 მლნ ლარს აღემატება.

„კომპანია „ადითი“ რამოდენიმე თვის განმავლობაში იხდიდა სახელფასო დავალიანებას საინვესტიციო თანხებიდან. მაგრამ, სადაზღვევო კომპანიების დავალიანების გადახდის საკითხის დაურეგულირებლობის გამო, კომპანიის მუშაობა საბოლოოდ შეჩერდა, ისევე როგორც საინვესტიციო შეთანხმება. აქედან გამომდინარე, მიმდინარეობს რამდენიმე სასამართლო დავა და ამ დავების ფარგლებში დადგინდება სახელფასო დავალიანების ოდენობა და დარეგულირდება დაფარვის საკითხი“, - ამბობენ კომპანიაში და ამატებენ, რომ სახელფასო დავალიანების ოდენობის დადგენა ამ ეტაპზე შეუძლებელია,- „სახელმწიფო ექსპერტიზამაც ვერ დაადგინა სახელფასო დავალიანების ოდენობა, ვინაიდან ეს შეუძლებელია კომპანია „ადითის“ მიმართ სადაზრვევო კომპანიების დავალიანების დადგენის გარეშე“.

გაასაჩივრებს თუ არა სასამართლოს გადაწყვეტილებას „ადითი“, ამ ეტაპზე უცნობია. თუ დავა სხვა ინსტანციებში აღარ გაგრძელდება, საავადმყოფოს თანამშრომლები უკვე თანხების მიღებისთვის დაიწყებენ ბრძოლას.

ამ ეტაპზე, კი ასპინძის სამედიცინო დაწესებულებაში არსებული ვითარებით კმაყოფილი არიან.

„სისტემატურად გვაქვს ანაზღაურება, რეგულარულად გვამარაგებენ მედიკამენტებით“, - ამბობს მანანა ცინაძე.

[თინათინ ზაზაძე, ასპინძა]