ვალეში გათავისუფლებული 30 მუშიდან 7 სამსახურში დააბრუნეს

ჯერ გათავისუფლებული და შემდეგ სამსახურში აღდგენილი თანამშრომლები ამბობენ, რომ დაიბარეს ადმინისტრაციაში, ადგილობრივ უფროსთან და აცნობეს, რომ სამსახურში აღდგენილები არიან.

ამ დროისთვის 7–ვე მათგანი აქციის მონაწილეებთან ერთად იმყოფება. ისინი საერთო განწყობას იზიარებენ და ამბობენ, რომ მართალია სამსახურში აღადგინეს, თუმცა, მუშაობას არ განაახლებენ, ვიდრე მათი მოთხოვნები არ დაკმაყოფილდება.

მუშები ითხოვენ სამუშაო პირობები და საკვები გაუმჯობესდეს და მოუმატონ დაკლებული ხელფასები. შეგახსენებთ, აქციის მონაწილეები ამბობენ, რომ ხელფასები 600–დან 400 ლარამდე შეუმცირეს იმით, რომ დააკლეს სამუშაო საათები.

ვალეში, იქ სადაც, სამხრეთ კავკასიური გაზსადენის გაფართოების პროექტის ფარგლებში, სამშენებლო სამუშაოები მიმდინარეობს, საპროტესტო აქცია დილიდან დაიწყო. მუშებმა პროტესტის ნიშნად სამუშაოები არ შეასრულეს და გადაკეტეს ადმინისტრაციის ოფისამდე მისასვლელი გზა. ისინი კომპანიის წარმომადგენელთან შეხვედრას ითხოვენ. აქციის დროს მუშებს განუცხადეს, რომ თბილისიდან, რუსთავიდან და გარადაბანიდან გადმოყვანილი 30 თანამშრომელი სამსახურიდანაა გაშვებული.

აქციის მონაწილეები შუამდგომლობას სთხოვენ სამცხე–ჯავახეთის გუბერნატორს, თუმცა, 09:00 საათიდან ამ დრომდე, 14:00 საათამდე, გუბერნიიდან მათთან არავინ მისულა. სამხრეო ადმინისტრაციაში ამბობენ, რომ აქციის შესახებ იციან, თუმცა, „კონკრეტულად ითხოვენ თუ არა აქციის მონაწილეები გუბერნატორთან შეხვედრას ამის შესახებ ინფორმაცია არ აქვთ“.

ხელისუფლებიდან აქციის მონაწილეებთან მხოლოდ ახალციხის მუნიციპალიტეტის გამგებლის წარმომადგენელი ვალის ტერიტორიულ ორგანოში, ელიოზ ბარბლიშვილი მივიდა.

„ჩავაყენებთ საქმის კურსში ადგილობრივ თვითმმართველობას, სავარაუდოდ, შევხვდებით კომპანიის ხელმძღვანელობასაც“, – განაცხადა ბარბლიშვილმა.

მუშებთან მივიდა საპარლამენტო უმცირესობის წევრი, ახალციხის მაჟორიტარი დეპუტატი „ერთიანი ნაციონალური მოძრაობიდან“ ვაჟა ჩიტაშვილიც. დეპუტატი გაფიცულებს მხარდაჭერას უცხადებს და ამბობს, რომ საჭიროების შემთხვევაში დაეხმარება გათავისუფლებულებს სამართლებრივი დავის წამოწყებაში.

აქციის მონაწილეებს კოცონი აქვთ დანთებული, შიმშილის მოსაკლავად, ახლომდებარე ნაკვეთიდან კარტოფილი ამოყარეს და წვავენ. მათი მოთხოვნები უცვლელია. ამბობენ, რომ თუ საჭირო გახდა, აქციას არც ღამით შეწყვეტენ.









[ვარლამ წიკლაური, ნინო ნარიმანიშვილი, ახალციხე]