ვალედან გათავისუფლებული მუშები გარდაბანში ბრუნდებიან

19–ვე თანამშრომელი ამ წუთებში სასტუმრო „თეთრ სახლში“ ოთახებს ცლის. ისინი თავიანთ ნივთებს „მიკროავტობუსში“ ალაგებენ და გარდაბანში ბრუნდებიან.

შეგახსენებთ, ვალეში, საპროტესტო აქციის დროს გაშვებული 30 მუშიდან 19 სამსახურში აღარ დააბრუნეს და არც კომპანიის დაქირავებულ სასტუმროში შეუშვეს ღამის გასათევად.

ახალციხეში, სასტუმრო „თეთრ სახლთან“, რომელიც კომპანია "ბეხტელ & ენკა"–ს აქვს დაქირავებული საღამოს საათებში დაცვის პოლიციის თანამშრომლები იყვნენ მობილიზებული. პოლიციის თანამშრომლებმა მუშების ნაწილს შენობის დატოვება მოსთხოვეს.

შეგახსენებთ, ვალეში, სამხრეთ-კავკასიური გაზსადენის გაფართოების პროექტის სამუშაოებზე დასაქმებული მუშები დღეს დილიდან საპროტესტო აქციას მართავდნენ. ისინი აპროტესტებდნენ სამუშაო საათების შემცირებას, რის გამოც მათი ხელფასი 600–დან 400–მდე შემცირდა, ითხოვდნენ შაბათ–კვირის მუშაობის ანაზღაურებას ან ამ დღეებისთვის დამატებით ანაზღაურებას და საკვების გაუმჯობესებას. ვალეში საპროტესტ აქცია დილით დაიწყო და შუადღემდე გაგრძელდა. აქციის მონაწილეები იმ პირობით დაიშალნენ, რომ მშვიდობიან პროტესტს ხვალაც გააგრძელებენ.

[ვარლამ წიკლაური, ნინო ნარიმანიშვილი, ახალციხე]