ვალეში გაფიცულები საკვების მანქანას უფროსებამდე არ უშვებენ

მანქანას, რომელმაც ობიექტზე საჭმელი მიიტანა, თან მიჰყვნენ შსს ახალციხის რაიონული სამმართველოს მანქანები. სამართალდამცავები ამბობენ, რომ ისინი იქ წესრიგის დასაცავად არიან.

„ჩვენ შიმშილით ვიხოცებით, ეგენიც (ადმინისტრაცია ს.კ.) უნდა დაიხოცონ“, – აცხადებენ აქციის მონაწილეები.

"გვშია" – ისმის იმ შენობებიდან, სადაც ადმინისტრაციის წარმომადგენლები იმყოფებიან. თუმცა, მუშები მანქანის გტარებას არ აპირებენ.

"არ შევუშვებთ საჭმლის მანქანას, არც გამოვუშვებთ იქიდან არავის", – ამბობენ მუშები.

ამ დროისთვის ვალეში ვითარება დაძაბულია.

შეგახსენებთ, დღეს დილის 09:00 საათიდან, ვალეში 200-მდე მუშაა გაფიცული. ისინი სამუშაო პირობებს, კვებასა და სამუშაო საათების შემცირების გამო ხელფასის დაკლებას აპროტესტებენ და აცხადებენ, რომ ვიდრე მათ მოთხოვნებს არ მოისმენენ და პასუხს არ გასცემენ, აქციას არ შეწყვეტენ.

იხილეთ აქციის ქრონიკა და დეტალები.

[ვარლამ წიკლაური, ნინო ნარიმანიშვილი, ახალციხე]