ვალეში გაფიცული მუშები გუბერნატორთან შეხვედრას ითხოვენ

გაფიცულები აცხადებენ, რომ მანამდე არ დაიშლებიან, ვიდრე სამხარეო ადმინისტრაციის ხელმძღვანელს არ შეხვდებიან.

„რა პირობებიც ქონდათ არ შეასრულეს. აქ უნდა ემუშავა 70% ადგილობრივ მოსახლეობას, სათითაოდ ანაცვლებენ თურქებით. უბრალო მიზეზის გამო ათავისუფლებენ სამსახურიდან ქართველებს. მონებივით გვამუშავებენ. გვინდა გავესაუბროთ გუბერნატორს და ამ ყველაფრის შესახებ მოვუყვეთ. მანამდე არ გავატარებთ არცერთ ტრანსპორტს და არ დავიშლებით“, – აცხადებენ გაფიცულები.

სამხარეო ადმინისტრაციაში აცხადებენ, რომ აქციის შესახებ იციან, თუმცა კონკრეტულად ითხოვენ თუ არა აქციის მონაწილეები გუბერნატორთან შეხვედრას ამის შესახებ ინფორმაცია არ აქვთ.

„კომუნიკაცია აღნიშნული შეხვედრის მოთხოვნის თაობაზე არ შემდგარა. რამდენადაც ვიცით მათ გარკვეული პრეტენზიები აქვთ დამსაქმებელ კომპანიასთან და იმედს ვიტოვებთ პრობლემა ორივე მხარისთვის მისაღები შედეგით დასრულდება. საჭიროების შემთხვევაში გუბერნატორი მზად არის შეხვდეს აქციის მონაწილეებს“, – აცხადებენ სამხარეო ადმინისტრაციაში.

შეგახსენებთ, დღეს დილის 09:00 საათიდან, ვალეში 200-მდე მუშაა გაფიცული. ისინი ვალეს საბაჟოსკენ მიმავალი გზის გადაკეტვით იმუქრებიან. ახლა მათ ადმინისტრაციის ოფისამდე მისასვლელი გზა აქვთ გადაკეტილი. არ გაატარეს ერთ-ერთი უფროსის მანქანაც. მუშების ინფორმაციით, გაფიცულებიდან 30 ადამიანი მშენებელმა კომპანიამ სამსახურიდან გაუშვა. აქციის მონაწილეებთან მივიდნენ საპარლამენტო უმცირესობის წევრი ვაჟა ჩიტაშვილი და გამგებლის წარმომადგენელი ვალეში ელიოზ ბარბლიშვილი. ისინი დაპირდნენ, რომ შეეცდებიან მათ ხელმძღვანელობას შეხვდნენ.

ბოლო მონაცემებით, გაფიცულებმა გასათბობად ცეცხლი დაანთეს და ამბობენ, რომ არ დაიშლებიან, ვიდრე მათი მოთხოვნები არ დაკმაყოფილდება.


აქციის მონაწილეები კოცონზე კარტოფილს წვავენ.


აქციის მონაწილეები კოცონზე კარტოფილს წვავენ.

[ვარლამ წიკლაური, თინათინ ზაზაძე, ახალციხე]