ვალეში მუშების საპროტესტო აქცია დასრულდა

მუშები აცხადებენ, რომ ხვალ იგივე დროს და იგივე ადგილას შეიკრიბებიან, თან წაიღებენ საკვებს და ისევ გამართავენ მშვიდობიან აქციას, ადმინისტრაციისთვის განკუთვნილი საჭმლის მანქანასაც გაატარებენ, თუმცა, მუშაობას არ გააგრძელებენ: „ჩვენ გავაგრძელებთ მშვიდობიან პროტესტს და არ ვიმუშავებთ იქამდე, ვიდრე ჩვენი მოთხოვნები არ დაკმაყოფილდება“.

მუშების მთავარი მოთხოვნაა გაუზარდონ შემცირებული ხელფასი. ისინი ამბობენ, რომ ანაზღაურება 600 ლარიდან 400 ლარამდე შეუმცირეს, იმით, რომ დააკლეს სამუშაო საატები. დღეს მათ აქცია ისე დაასრულეს, რომ კომპანია "ბეხტელ & ენკა"–დან მათთან არავინ მივიდა.

შეგახსენებთ, ვალეში, იქ სადაც, სამხრეთ კავკასიური გაზსადენის გაფართოების პროექტის ფარგლებში, სამშენებლო სამუშაოები მიმდინარეობს, საპროტესტო აქცია დილიდან დაიწყო. მუშებმა პროტესტის ნიშნად სამუშაოები არ შეასრულეს და გადაკეტეს ადმინისტრაციის ოფისამდე მისასვლელი გზა. ისინი კომპანიის წარმომადგენელთან შეხვედრას ითხოვდნენ.

აქციის დროს მუშებს განუცხადეს, რომ თბილისიდან, რუსთავიდან და გარდაბანიდან გადმოყვანილი 30 თანამშრომელი სამსახურიდანაა გაშვებული. თუმცა, მოგვიანებით 7 გათავისუფლებულს უთხრეს, რომ სამსახურში აღადგინეს.

აქციის მონაწილეები შუამდგომლობას სთხოვდნენ სამცხე–ჯავახეთის გუბერნატორს, თუმცა, აქცია ისე დასრულდა, რომ გუბერნიიდან მათთან არავინ მივიდა.

ხელისუფლებიდან აქციის მონაწილეებთან მხოლოდ ახალციხის მუნიციპალიტეტის გამგებლის წარმომადგენელი ვალის ტერიტორიულ ორგანოში, ელიოზ ბარბლიშვილი მივიდა.

„ჩავაყენებთ საქმის კურსში ადგილობრივ თვითმმართველობას, სავარაუდოდ, შევხვდებით კომპანიის ხელმძღვანელობასაც“, – განაცხადა ბარბლიშვილმა.

მუშებთან მივიდა საპარლამენტო უმცირესობის წევრი, ახალციხის მაჟორიტარი დეპუტატი „ერთიანი ნაციონალური მოძრაობიდან“ ვაჟა ჩიტაშვილიც. დეპუტატი გაფიცულებს მხარდაჭერას უცხადებს და ამბობს, რომ საჭიროების შემთხვევაში დაეხმარება გათავისუფლებულებს სამართლებრივი დავის წამოწყებაში.

აქციის მონაწილეებს კოცონი ჰქონდათ დანთებული, შიმშილის მოსაკლავად, ახლომდებაზე ნაკვეთიდან კარტოფილი ამოყარეს და შეწვეს.

აქციის მონაწილეებმა გააკეტეს გზა და არ გაატარეს მანქანა, რომელსაც ადმინისტრაციისთვის განკუთვნილი საჭმელი ჰქონდა. მანქანა ჯერ უკან გაბრუნდა, მოგვიანებით ისევ მივიდა და გაწევ–გამოწევისა და მსჯელობის შემდეგ, შეუშვეს. როგორც გაფიცულები ამბობენ, მათ უთხრეს, "რომ თუ მანქანას არ შეუშვებდნენ, მთელი სამხარეო სამმართველო ავიდოდა".

[ვარლამ წიკლაური, ნინო ნარიმანიშვილი, ახალციხე]