საპროტესტო აქცია ვალეში

აქცია ვალეში, 2 დკემბერი, 2015წ.

ვალეში, იქ სადაც გაზსადენის გაფართოების პროექტის ფარგლებში საცხოვრებლების მშენებლობა მიმდინარეობს, დილიდან 200-მდე მუშაა შეკრებილი. ისინი სამუშაო პირობებს აპროტესტებენ. მუშები აცხადებენ, რომ სამუშაო საათები დააკლეს, რის გამოც, მათი ანაზღაურება 600-დან 400 ლარამდე შემცირდა.

„მონებივით გვექცევიან, სიგარეტის მოწევისა და ჩაის დალევის საშუალებას არ გვაძლევენ. ხელფასი და საკვები დაგვაკლეს“... -აცხადებენ გაფიცულები.

აქციის მონაწილეები დახმარებასა და მშენებელ კომპანიასთან შუამდგომლობას რეგიონის ხელმძღვანელობას სთხოვენ.

„ჩვენ, ქართულ მიწაზე მოდიხარ და მე არ მცემ პატივს. ეგვიპტის მონების დღეში ვართ. ჩაი როგორ არ უნდა დაალევინო ყინვაში“, - ამბობს ერთ-ერთი მონაწილე ბადრი ჯინიუზაშვილი.

სამხრეთ-კავკასიური გაზსადენის გაფართოების პროექტში სამუშაოებს თურქული კომპანია "ბეხტელ & ენკა" ასრულებს. როგორც მუშები გვიხსნიან, ამ ეტაპზე შენდება საცხოვრებლები მათთვის, ვინც პროექტის ამოქმედების შემდეგ აქ უნდა იმუშაოს.

გაფიცულები ამბობენ, რომ სამუშაოებს იმ დრომდე არ განაახლებენ, ვიდრე მათთან კომპანიიდა ან ადგილობრივი ხელისუფლებიდან ვინმე არ მივა. თუ მათ პროტესტს არავინ გამოეხმაურა, ვალეს საბაჟოსთან გზის გადაკეტვას აპირებენ.

აქცია დილის 09:00 საათზე დაიწყო. ამ დრომდე გაფიცულებთან არავინ მისულა.



შეგახსენებთ, რომ სამხრეთ-კავკასიური გაზსადენის გაფართოების პროექტს კომპანია BP კურირებს. 56 კმ სიგრძის გაზსადენისა და სამი ახალი მუდმივმოქმედი მიწისზედა ობიექტის მშენებლობა დახლოებით 6 თვის წინ დაიწყო. ეს ეგრეთ წოდებული "შაჰ დენიზის" მეორე ეტაპია.

"სამხრეთ კავკასიური გაზსადენის გაფართოების პროექტი სისტემის პირველ რგოლს წარმოადგენს,რომელიც ინტეგრირებული მილსადენებისგან
შედგება და ახალ სამხრეთ კავკასიური გაზის კორიდორს ქმნის. როდესაც მშენებლობა დასრულდება,სამხრეთის კორიდორის სიგრძე დაახლოებით
3500 კილომეტრს შეადგენს და მის შემადგენლობაში იქნება SCPX, ტრანსანატოლიური გაზსადენი (TANAP) და ტრანსადრიატიკული გაზსადენი (TAP). ნავარაუდევია, რომ მოცემული ქსელის მეშვეობით წელიწადში 16 მილიარდი კუბური მეტრი გაზი იქნება მიწოდებული მილიონობით მომხმარებლისთვის საქართველოში, თურქეთში, საბერძნეთში, ბულგარეთსა და იტალიაში.გაზის პირველი პარტიის მიწოდება საქართველოსა და თურქეთის მომხმარებლებისთვის 2018 წლის ბოლოსთვის არის დაგეგმილი, ხოლო ევროპისთვის გაზის მიწოდება 2020 წელს დაიწყება", - ვკითხულობ თანგარიშში "BP საქართველოში".

ამ პროექტის ფარგლებში სამშენებლო სამუშაოები მიმდინარეობს გარდაბანშიც. ვალეში გაფიცულები ამბობენ, რომ დღეს დილიდან მუშები გარდაბანშიც გაიფიცნენ.

დილიდან ვალეში იმყოფება "სამხრეთის კარიბჭეს" ჟურნალისტიც. თვალი ადევნეთ ვებგვერდს, მოვლენათა განვითარების შესახებ აუცილებლად გიამბობთ.

[ვარლამ წიკლაური, ნინო ნარიმანიშვილი, ახალციხე]