ვალეში გაფიცულებიდან 19 მუშა სამსახურიდანაც გაუშვეს და სასტუმროდანაც

ახალციხეში, სასტუმრო „თეთრ სახლთან“, რომელიც კომპანია "ბეხტელ & ენკა"–ს აქვს დაქირავებული ამ წუთებში დაცვის პოლიციის თანამშრომლები არიან მობილიზებული. პოლიციის თანამშრომლებმა მუშების ნაწილს შენობის დატოვება მოსთხოვეს.

საუბარია იმ 19 მუშაზე, რომელიც კომპანიამ სამსახურიდან გაუშვა. ეს ის მუშები არიან, რომელიც კომპანიამ სამუშაოდ თბილისიდან, რუსთავიდან და გარდაბანიდან გადმოიყვანა და რომელთაც დილით აცნობეს, რომ ხელშეკრულებები შეუწყდათ. შეგახსენებთ, საღამოს ამ 30–დან სამსახურში მხოლოდ 7 მუშა დააბრუნეს.

„გვეუბნებიან, რომ შენობა დავტოვოთ, სად წავიდეთ, არც ფული გვაქვს და არც ღამის გასათევი. პოლიცია გვეუბნება, წინააღმდეგობას თუ გაგვიწევთ, დაგიჭერთო“, – ამბობენ მუშები.

შეგახსენებთ, ვალეში, სამხრეთ-კავკასიური გაზსადენის გაფართოების პროექტის სამუშაოებზე დასაქმებული მუშები დღეს დილიდან საპროტესტო აქციას მართავდნენ. ისინი აპროტესტებდნენ სამუშაო საათების შემცირებას, რის გამოც მათი ხელფასი 600–დან 400–მდე შემცირდა, ითხოვდნენ შაბათ–კვირის მუშაობის ანაზღაურებას ან ამ დღეებისთვის დამატებით ანაზღაურებას და საკვების გაუმჯობესებას. ვალეში საპროტესტ აქცია დილით დაიწყო და შუადღემდე გაგრძელდა. აქციის მონაწილეები იმ პირობით დაიშალნენ, რომ მშვიდობიან პროტესტს ხვალაც გააგრძელებენ.

[ვარლამ წიკლაური, ნინო ნარიმანიშვილი, ახალციხე]