დღე III - ვალეში გაფიცულმა მუშებმა პროტესტი განაახლეს

მათი მოთხოვნები კვლავ უცვლელია: დაუბრუნდნენ მუშაობის ძველ რეჟიმს, ანუ მოიმატოს მათი სამუშაო საათების რაოდენობამ და შესაბამისად ხელფასმა, ორმაგად აუნაზღაურდეთ შაბათ დღეს მუშაობა და გაუმჯობესდეს კვება.

შეგახსენებთ, ვალეში საპროტესტო აქცია 1 დეკემბერს დაიწყო, ამ დღეს 200–მდე მუშა გაიფიცა. დილის 09:00 საათიდან დაწყებული აქცია 15:00 საათამდე გაგრძელდა. მუშები ითხოვდნენ კომპანიის ხელმძღვანელობასთან დალაპარაკებას, თუმცა უშედეგოდ. ასევე უშედეგოდ ელოდნენ შუამდგომლობას სამცხე–ჯავახეთის სამხარეო ადმიისტრაციიდან.

ამ დღეს კომპანიამ სამსახურიდან 19 თანამშრომელი გაათავისუფლა, იმ მოტივით, რომ ისინი თბილისიდან და გარდაბნიდან იყვნენ გადმოყვანილი. გათავისუფლებულები ღამით სასტუმროდანაც გაყარეს.

აქცია მეორე დღეს, 3 დეკემბერსაც გაგრძელდა. მუშები ისევ ავიდნენ სამშენებლო ობიექტზე, შედარებით ნაკლები, დაახლოებით 100 ადამიანი და იგივე მოთხოვნები წაუყენეს კომპანიას. „ბეხტელ–ენკას“ ადგილობრივმა ხელმძღვანელობამ გაფიცულებს მოლაპარაკება შესთავაზა. მუშებმა სათათბიროდ 4 ადამიანი შეარჩიეს, შეხვედრა ჟურნალისტებისთვის დახურულ კარს მიღმა შედგა. კომპანიამ მუშებს მოთხოვნების დაკმაყოფილებაზე უარი უთხრა.

გაფიცულები ამ დღესაც შუადღეს დაიშალნენ, იგივე პირობით, ისინი ამბობენ, რომ მშვიდობიან პროტესტს იქამე გააგრძელებენ, ვიდრე კომპანია მათ მოთხოვნებს არ დააკმაყოფილებს.

[sknews.ge]