ვალეში გაფიცულმა მუშებმა აქცია დაასრულეს

კომპანიის ხელმძღვანელობასა და მუშებს შორის შემდგარი უშედეგო მოლაპარაკების შემდეგ მალევე, გაფიცულმა მუშებმა აქცია დაასრულეს.

მუშები ამბობენ, რომ ხვალ იგივე დროს და იგივე ადგილზე შეიკრბებიან. ისინი ფიქრობენ, რომ პროტესტი იქამდე გააგრძელონ, ვიდრე კომპანია მათ მოთხოვნებს არ დააკმაყოფილებს.

მუშებს სამი მოთხოვნა აქვთ: ზამთრის რეჟიმის გამო შემცირებული სამუშაო საათები ისევ გაიზარდოს, რის შედეგადაც მათი ანაზღაურებაც გაიზრდება. შეგახსენებთ, ადრე მათი სამუშაო დღე იწყებოდა 07:30 საათზე და საღამოს 19:00 საათამდე გრძელდებოდა, ბოლო რამდენიმე დღეა, სამუშაო დღე 08:00 საათზე იწყება და 18:00 საათზე მთავრდება. ხანგრძლივობის შემცირების გამო მუშებს ხელფასი დაახლოებით 150–200 ლარით შეუმცირდათ.

მეორე მოთხოვნაა, შაბათს ორმაგი ანაზღაურება მისცენ, ისევე როგორც კვირას აძლევენ.

მესამე მოთხოვნა კი კვებას უკავშირდება. მუშები ამბობენ, რომ შუადღის ლანჩზე მხოლოდ ჩაი აქვთ და მენიუს გაუმჯობესება უნდათ. თუმცა, აქვე ამატებენ, რომ ეს მოთხოვნა არსებითად მნიშვნელოვანი არ არის და ძველ მენიუზეც თანახმა არიან.

შეგახსენებთ, ვალეში, სამხრეთ კავკასიური გაზსადენის გაფართოების პროექტზე დასაქმებულები მეორე დღეა პროტესტის ნიშნად მუშაობაზე უარს აცხადებენ.

იხილეთ გუშინდელი დღის ქრონიკა.

[ვარლამ წიკლაური, ნინო ნარიმანიშვილი, ახალციხე]