ოთხთვიანი ლოდინის შემდეგ, ასპინძის ქუჩაზე, უსახურავო კორპუსის გადახურვა დაიწყო

შპს „სამცხე 21“-მ ასპინძის ქუჩის #28-ე ხუთსართულიანი კორპუსის გადახურვის სამუშაოები რამდენიმე დღის წინ დაიწყო.

ახალციხის მუნიციპალიტეტის გამგეობამ სახურავის გადასახურად ტენდერი 22 ივლისს, 72 000 ლარზე გამოაცხადა. გამგეობაში განმარტავენ, რომ აღნიშნულმა შპს-მ ტენდერი 54, 800 ლარით მოიგო. ხელშეკრულების თანახმად, მშენებელმა სამუშაოები 8 ოქტომბერს უნდა დაასრულოს.

შპს „სამცხე 21“-ს დირექტორის გურამ ფარცახაშვილის თქმით, სამუშაოებს დათქმულ ვადაში დაასრულებენ.

შეგახსენებთ, აღნიშნულ კორპუსს ეგრეთ წოდებული, პრეზიდენტის წითელი სახურავი ძლიერმა ქარმა მიმდინარე წლის 23 აპრილს გადახადა. მას შემდეგ კორპუსის მცხოვრებლები ძლიერმა წვიმამ არაერთხელ ჩარეცხა. კორპუსის გადახურვას სამხარეო ადმინისტრაცია, გამგეობას ავალდებულებდა გამგეობა კი გუბერნიას.

აქვე შეგახსენებთ, რომ ახალციხეში კორპუსების სახურავების შეცვლა გასული, 2012 წლის აგვისტოში დაიწყო. სახურავი ახალციხეში 93 შენობას შეეცვალა. სახურავების შეცვლას წინ ივლისში, ძლიერი სეტყვა უსწრებდა. სტიქიით დაზარალებული მოსახლეობის დასახმარებლად თანხა პრეზიდენტის ფონდიდან გამოიყო. გადახურვის სამუშაოებზე 3576546,16 ლარი დაიხარჯა. ამიტომ „მონათლეს“ ადგილობრივებმა შეცვლილი სახურავები ”პრეზიდენტის წითელ სახურავებად”. მაშინ თანხა გუბერნიამ განკარგა, ამიტომ ავალდებულებდა გამგეობა უსახურავო კორპუსის შეკეთებას სამხარეო ადმინისტრაციას.

გარდა გამგეობა-გუბერნიის დავისა, კიდევ ერთი მიზეზი, რის გამოც გადახურვის გაჭიანურებას ხსნიდნენ, ექსპერტიზის დასკვნა იყო. 28 ივნისს საკრებულოს სხდომაზე ცნობილი გახდა დასკვნა, რომლის მიხედვითაც, სახურავის დაზიანება მშენებელის შეცდომა არ იყო. ამის შემდეგ აიღო თავის თავზე გამგეობამ აღნიშნული კორპუსის გადახურვის ვალდებულება.

[მანანა სარაშვილი, ახალციხე]