როდის გადაიხურება ძლიერი ქარის გამო გადახდილი სახურავი

ახალციხის მუნიციპალიტეტის გამგეობაში განმარტავენ, რომ ჯერ უნდა დადგინდეს კონკრეტულად ვისი ბრალეულობა იკვეთება და გადახურვა მხოლოდ ამის შემდგომ დაიწყოს.

- ”ამ ეტაპზე ჩვენი სამუშაო ჯგუფი ითვლის, თუ რა ზიანი მიადგა მოსახელობას და რა თანხა დასჭირდება სახურავის აღდგენას. ხვალ ველოდებით ექსპერტებს, რომლებიც შესაბამის დასკვნას დადებენ, თუ ვისი ბრალეულობა იკვეთება კონკრეტულად”, - განმარტავს ახალციხის მუნიციპალიტეტის გამგებლის მოვალეობის შემსრულებელი ბესიკ ბლიაძე და ამატებს, რომ როგორც კი ექსპერტიზის დასკვნა დაიდება აღდგენითი სამუშაოები მაშინვე დაიწყება.

აღნიშნულ ფაქტზე გამოძიება უკვე დაწყებულია. ახალციხის მუნიციპალიტეტის გამგეობაში ამბობენ, რომ კომოანიას, რომელმაც აღნიშნული კორპუსის სახურავი გადახურა სამცხე-ჯავახეთის სამხარეო ადმინისტრაციასთან დადებული ხელშეკრულების თანახმად ერთი წლის განმავლობაში სახურავის დაზიანებაზე პასუხისმგებლობა ეკისრება. შესაბამისად თუ აღნიშნული კომპანიის ბრალეულობა დადგინდა, მაშინ ის ვალდებული იქნება, რომ აღდგენითი სამუშაოები ჩაატაროს.

- ”აღნიშნული კორპუსის გადახურვა თავის დროზე გუბერნიისა და კერძო კომპანიის ერთობლივი ხელშეკრულებით მოხდა. თუმცა, ამ კორპუსს ჩვენი კეთილი ნებით გადავხურავთ, რადგან ვადაში არ გაიწელოს.მოგეხსენებათ გამოძიება შესაძლებელია ორი თვეც გაგრძელდეს და ორი თვე ამ კორპუსს გადაუხურავს არ დავტოვებთ”- განმარტავს ბესიკ ბლიაძე.

ვიდრე ექსპერტიზა ჩატარდება და კონკრეტული ბრალეულობა გამოიკვეთება ასპინძის ქუჩაზე, 28-ე კორპუსს სახურავის ნაცვლად ”ბრეზენტი” ექნება გადახურული.

- ”კომუნისტების დროს შენობები ბრტყელი გადახურვით იხურებოდა. ჩვენ შევამოწმეთ, სადაც საეჭვო იყო იქ პალატკები აქვს დაფარებული. თავსხმა წვიმას შეიძლება ვერ გაუძლოს, მაგრამ ელემენტარულად წვიმის დროს რომ არ დაზიანდეს, ეგ პრობლემა მოგვარებულია”, - ამბობს ბლიაძე.

ახალციხის მუნიციპალიტეტის გამგებლის მრჩეველი იურიდიულ საკითხებში გოჩა პარუნაშვილი ამბობს, რომ სახურავი ნარჩენებისგან ბოლომდე გაწმენდილი არ არის.

- ”ერთადერთი მიზეზი რის გამოც გაწმენდითი სამუშაოები არ მიმდინარეობს ისაა, რომ უნდა ჩატარდეს ექსპერტიზა. აღძრულია სისხლის სამართლის საქმე. იმ შემთხვევაში თუ ვიღაცის ბრალეულობა გამოიკვეთება სისხლის სამართლის ან სამოქლაქო კოდექსში არსებობს რეგრესის წესით დავა. სისხლის სამართლის ბრალეულობა იმთავითვე ითავლისწიენებს იმას, რომ დაზარალებულმა მოქალაქეებმა უკვე მიმართონ იმას, ვისი ბრალეულობითაც ეს ფაქტი მოხდა. ჩვენ ამ შემთხვევაში აბსოლიტურად არაფერ შუაში არ ვართ. შეიძლება ისიც დადგინდეს, რომ სტიქიის გამო მოხდა”, - ამბობს გოჩა პარუნაშვილი.

[თამარ თოთაძე, ახალციხე]