ახალციხეში ძლიერმა ქარმა საცხოვრებელ კორპუსს სახურავი გადახადა

ახალციხეში ძლიერმა ქარმა და წვიმამ N103 კორპუსს სახურავის ნაწილი გადახადა და მოგლეჯილი სახურავის ნაწილი, კორპუსის წინ აშენებულ ავტოფარეხებზე დაეცა.შემთხვევის შედეგად არავინ დაშავებულა.

წყალი ჩასდით მეხუთე სართულზე მცხოვრებლებს. ამ დროისთვის N103 კორპუსს ელექტროენერია არ მიეწოდება.

ქარი და წვიმა დაახლოებით 15:00 საათზე დაიწყო.

ადგილზე მობილიზებულია საპატრულო პოლიცია და სამაშველო სამსახურის ბრიგადები.

აღნიშნული სახურავი 2012 წლის ივლისში მთავრობის ფონდიდან გამოყოფილი თანხით გაკეთდა. მაშინ ძლიერი სეტყვის შედეგად დაზიანებული სახურავების გადასახურად მთავრობის ფონდიდან 3576546,16 ლარი გამოიყო. ამ თანხით 152 შენობა-ნაგებობა (საერთო ფართობით 93105 მ2. აქედან ახალციხეში 93 და ქალაქ ვალეში 59 შენობა) გადაიხურა.

N103 კორპუსის სახურავი ახალციხის მუნიციპალიტეტის ახლადარჩეული გამგებლის ზაზა მელიქიძის ფირმამ შპს "მელიზამ" გააკეთა.

"ინფორმაცია არ მაქვს რა მოხდა, ჯერ ვერაფერს გეტყვით", - განაცხადა "სამხრეთის კარიბჭესთან" სატელეფონო საუბარში ზაზა მელიქიძემ.

შეგახსენებთ რომ 2012 წელს გაკეთებულ წითელ სახურავებს შორის, ეს მესამე სახურავია, რომელიც ქარმა გადახადა.





[sknews.ge]