ასპინძის ქუჩაზე სახურავგადახდილ კორპუსს გამგეობა გადახურავს

ახალციხის მუნიციპალიტეტის გამგეობა ასპინძის ქუჩის #28-ში მდებარე 5-სართულიანი კორპუსის გადახურვაში დახმარებას ფინანსთან სამინისტროს მომსახურების სააგენტოს სამცხე-ჯავახეთის სამმართველოს სთხოვს.

ახალციხის მუნიციპალიტეტის გამგებელმა ბესიკ ბლიაძემ გასულ კვირას ფინანსთან სამინისტროს მომსახურების სააგენტოს სამცხე-ჯავახეთის სამმართველოს უფროსს გიორგი კახნიაშვილს ელექტრონული წერილი გაუგზავნა, სადაც ის სამმართველოს ჩამორთმეული მასალის გამგეობისთვის უსასყიდლოდ გადაცემას სთხოვს.

- ”ის მასალა, რომელიც ჩამორთმეული და აუქციონზე არ არის გატანილი, მათ აქვთ უფლება რომ ჩვენ უსასყიდლოდ გადმოგვცენ. სპეციალისტებმა დაიანგარიშეს და სავარაუდოდ 55 კუბური მეტრი მასალა დაგვჭირდება”,-ამბობს ახალციხის მუნიციპალიტეტის გამგებლის მოადგილე მალხაზ ჟუჟუნაძე.

როგროც კახნიაშვილი ამბობს, მას ამ დრომდე წერილი არ მიუღია: ”როგორც კი წერილს მივიღებ მას შესაბამისი რეაგირება მოყვება. ჩვენ მიმართვას გავაკეთებთ ფინანსთა მინისტრის მოადგილის სახელზე და მასალა ამის შემდეგ გამოიყოფა”.

როგორც კი ფინანსთან სამინისტროს მომსახურების სააგენტოს სამცხე-ჯავახეთის სამმართველო გამგეობას საჭირო მასალას გადაცემს, კორპუსის დახურვის სამუშაოები დაიწყება. ჟუჟუნაძის თქმით, გადახურვაში მონაწილეობას მოსახლეობაც მიიღებს.

შეგახსენებთ, რომ მიმდინარე წლის 23 აპრილს, ძლიერმა ქარმა საცხოვრებელ კორპუსს ეგრეთ წოდებული ”პრეზიდენტის წითელი სახურავი” მთლიანად მოგლიჯა. ამ ხნის განმავლობაში ახალციხის მუნიციპალიტეტის გამგეობაში ექსპერტიზის დასკვნას ელოდებოდნენ. სანამ არ გაიგებდნენ ვისი ბრალეულობა იკვეთებოდა კონკრეტულ შემთხვევაში ვერანაირ რეაგრიებას ვერ მოახდენდნ. იმ შემთხვევაში, თუ დასკვნის მიხედვით სამუშაოს უხარისხოდ შესრულებისთვის მშენებელი კომპანია იქნება დამნაშავე, მაშინ გადახურვის ვალდებულება კვლავ მას დაეკისრება.

ექსპერტიზის დასკვნა გამგეობას ამ დრომდე არ მიუღია.

- ”ექსპერტიზის დასკვნის მოსვლის შემდეგ თუ გაირკვა, რომ სახურავი კორპუსს სტიქიამ გადახადა, ადგილობრივი ბიუჯეტიდან თანხა გამოიყოფა. მაგრამ თუ მშენებელი ორგანიზაციის შპს ”გონიოს” ბრალეულობა გამოიკვეთა, მაშინ ხარჯის ღირებულების გადახდა მას დაეკისრება”, - ამბობს ჟუჟუნაძე.

[მანანა სარაშვილი, ახალციხე]