ახალციხეში ქარმა საცხოვრებელ კორპუსს სახურავი გადახადა

შემთხვევას მსხვერპლი არ მოჰყოლია. მსუბუქად დაზიანდა მეზობლად მცხოვრები 60 წლის ქალბატონი.

როგორც თვითმხილველები ყვებიან, იგი სახლში სხვების დაუხმარებლად დაბრუნდა.

”თავი ჰქონდა დაზიანებული მსუბუქად, შევთავაზე რომ სახლამდე მაინც მივაცილებდი, თუმცა არ დამთანხმდა”, - ამბობს იზა კვინიკაძე.

ეზოში ჩამოვარდნილმა სახურავმა იქვე მდგომი 4 მსუბუქი მანქანაც დააზიანა.

ამ დროისთვის ადგილზე მობილიზებული არიან სამაშველო სამსახურის, პოლიციისა და ადგილობრივი თვითმმართვეობის წარმომადგენლები.

შემთხვევის ადგილზე იმყოფება ”სამხრეთის კარიბჭის” ჟურნალისტიც. მოვლენების განვითარების შესახებ ინფორმაციას ეტაპობრივად შემოგთავაზებთ.

შეგახსენებთ, რომ სტიქიით დაზარალებულთათვის პრეზიდენტის ფონდიდან გამოყოფილი თანხით მრავალბინიანი სახლების გადახურვა გასული წლის შემოდგომით დასრულდა.

[www.sknews.ge]