როდის გადახურავენ სახურავგადახდილ კორპუსს?

ასპინძის ქუჩის #28-ში მდებარე ხუთსართულიანი კორპუსის გადასახურად ახალციხის მუნიციპალიტეტის გამგეობამ დახმარება ფინანსთა სამინისტროს მომსახურების სააგენტოს სამცხე-ჯავახეთის სამმართველოს სთხოვა. გამგეობა სამმართველოს ჩამორთმეული მასალის უსასყიდლოდ გადაცემას სთხოვს.

ფინანსთა სამინისტროს მომსახურების სააგენტოს სამცხე-ჯავახეთის სამმართველოს უფროსის გიორგი კახნიაშვილის თქმით, ახალციხის მუნიციპალიტეტის გამგეობას ჩამორთმეული მასალა მას შემდეგ გადაეცემა, როცა საქართველოს ფინანსთა სამინისტროს მომსახურების სააგენტოდან ბრძანებას მიიღებენ.

„ახალციხის მუნიციპალიტეტის გამგეობისგან წერილი გასულ კვირას მივიღეთ და მეორე დღესვე დეპარტამენტში გავაგზავნეთ. დღეს დეპარტამენტიდან ინფორმაციას ველოდებით იმის შესახებ, თუ რამდენი ცალი ფიცარი და კოჭი უნდა გადავცეთ“,-ამბობს კახნიაშვილი.

მისივე თქმით, ახალციხის მუნიციპალიტეტის გამგეობას მასალა სავარაუდოდ კვირის ბოლოს გადაეცემა.

შეგახსენებთ, რომ აღნიშნულ კორპუსს ე.წ. პრეზიდენტის წითელი სახურავი ძლიერმა ქარმა 23 აპრილს გადახადა. მას შემდეგ კორპუსის მცხოვრებლები ძლიერმა წვიმამ არაერთხელ ჩარეცხა. კორპუსის გადახურვას სამხარეო-ადმინისტრაცია გამგეობას ავალდებულებდა, გამგეობა კი გუბერნიას. გამგეობაში აცხადებდნენ იმასაც, რომ ვინ გადახურაავდა კორპუსს მას შემდეგ გაირკვეოდა, როცა ექსპერტიზის დასკვნა დაიდებოდა.

მომხდარიდან ორი თვის შემდეგ, გამგეობამ ასპინძის ქუჩაზე სახურავგადახდილი კორპუსის გადახურვა ისე გადაწყვიტა, რომ ჯერ ექსპერტიზის დასკვნა მიღებული არ ჰქონდა.

28-ე კორპუსის მცხოვრებლებს იმედი აქვთ, რომ მორიგ ძლიერ წვიმამდე გამგეობა მასალას მიიღებს და მომხდარიდან სამი თვის თავზე, კორპუსს სახურავს დაადგამენ.

[მანანა სარაშვილი, ახალციხე]