რა დაჯდა პრეზიდენტის წითელი სახურავები

სამცხე-ჯავახეთში პრეზიდენტის რწმუნებულის აპარატი ხელახლა გარემონტებულ სახურავებს მხოლოდ მას შემდეგ ჩაიბარებს, როცა ქალაქში წვიმა მოვა. ეს იმიტომ რომ 4 თვის წინ დასრულებულ სამუშაოებში ხარვეზები სწორედ ხანგრძლივი წვიმის შემდეგ გამოჩნდა.

თამარაშვილის #7-ში მშენებელ კომპანიას სამხარეო ადმინისტრაციამ სახურავების შემოწმება ”სამხრეთის კარიბჭეში“ დაბეჭდილი სტატიის შემდეგ სთხოვა. აქ მცხოვრებლებს წყალი ჩასდიოდათ. შპს ”მექანიკას“ ახლადგადახურული სახურავის გარემონტება თამარაშვილის #5-შიც მოუხდა.

წყალი ჩასდიოდათ 9 აპრილის ქუჩაზე მცხოვრებლებსაც.

-”9 აპრილზე სილა იყო საკვამურში გაჭედილი, გაწმინდეს და სილიკონით შეაკეთეს. რაც შეეხება თამარაშვილის ქუჩას აქ ხარვეზები უკვე აღმოფხვრეს, მაგრამ შეკეთებულს ჯერ არ ვიბარებთ, წვიმისას კიდევ ერთხელ შევამოწმებთ“, - ამბობს სამცხე-ჯავახეთის სამხარეო აპარატის საფინანსო-სამეურნეო სამსახურის უფროსი გოჩა ბერიძე.

მისი თქმით, სახურავების საგარანტიო ვადა ჯერ გასული არ არის, ამდენად მშენებელ ფირმებს მათი შეკეთება საკუთარი სახსრებით მოუხდათ.

გასული წელს კი ახალციხის მუნიციპალიტეტში სტიქიის შედეგად დაზიანებული სახურავების შესაკეთებლად პრეზიდენტის ფონდიდან 3576546,16 ლარი გამოიყო. ამ თანხით 152 შენობა ნაგებობა (საერთო ფართობით 93105 მ2. მათ შორის ახალციხეში 93 და ქალაქ ვალეში 59 შენობა) წითლად შეღებილი რკინის ფირფიტებით გადაიხურა.

რაც შეეხება ძველ მასალებს, როგორც სახელმწიფო რწმუნებულის აპარატის წერილიდან (#5/99 20.03.20013) ირკვევა ”95 პროცენტი ექსპლოატაციის ვადის გასვლის გამო, რასაც ასევე დაემატა სტიქიის შედეგად მიღებული დაზიანება, გამოუსადეგარი იყო. ვარგისი (მეორადი) მასალა დაურიგდა გაჭირვებულ და სტიქიით დაზარალებულ მოსახლეობას“.

ახალციხის მუნიციპალიტეტში მრავალბინიან სახლებზე სახურავების შეცვლა გასული წლის აგვისტოში დაიწყო და ნოემბერში დასრულდა.

[თამუნა უჩიძე, ახალციხე]