ახალციხეში საპრეზიდენტო პროგრამით გადახურული სახურავები შემოწმდება

ასპინძის ქუჩის 28–ე კორპუსის გადახდილი სახურავი. 2013 წელი, 23 აპრილი

ახალციხეში, კოსტავას ქუჩაზე მდებარე N184–ე კორპუსს, ძლიერმა ქარმა სახურავის ნაწილი მიმდინარე წლის 1 მაისს გადახადა.

ხუთსართულიანი კორპუსის სახურავი, შემთხვევიდან რამდენიმე დღეში, ინდ.მეწარმე რუსუდან ბალახაშვილმა გადახურა. იმავე სამშენებლო კომპანიამ, რომელმაც სამუშაოები 2012 წელს შეასრულა.

კოსტავას ქუჩაზე მდებარე N184–ე კორპუსის სახურავის დაზიანება პირველი შემთხვევა არაა. ახალგადახურულ სახურავებზე ხარვეზები მალევე გამოვლინდა.

მაგალითად, თამარაშვილის ქუჩაზე მდებარე ორ საცხოვრებელ კორპუსში მცხოვრებლებს სახლებში წვიმა ჩაუვიდათ. N7 კორპუსის ბოლო სართულზე წვიმის წყალმა ჩასვლა სახურავების შეკეთებიდან 8 თვეში დაიწყო. წყალი ჩასდიოდათ 9 აპრილის ქუჩაზე მცხოვრებლებსაც. დაზიანებები მშენებელმა კომპანიებმა შეაკეთეს.

გაცილებით მასშტაბური იყო დაზიანება ასპინძის ქუჩაზე. 28–ე კორპუსის მცხოვრებლები უსახურავოდ სახურავების შეცვლიდან 9 თვეში დარჩნენ. 2012 წელს, საპარლამენტო არჩევნების წინა პერიოდში შეცვლილი და მოგვიანებით ქარისგან მოგლეჯილი სახურავი, რამდენიმეთვიანი ლოდინის, არაერთი საჩივრისა და გამგეობისა და გუბერნიის ურთიერთბრალდებების შემდეგ, 4 თვის შემდეგ, გამგეობამ გადახურა.

„საკრებულოს ბოლო სხდომაზე განვიხილეთ ამ საპრეზიდენტო პროგრამის ფარგლებში შესრულებული სამუშაოები. გადავწყვიტეთ, რომ ამოვკრიბოთ ყველა ხელშეკრულება და გავიგოთ ვინ გააკეთა ეს პროექტები, ამ მშენებლებს დავუკავშირდებით და გავაფრთხილებთ, რომ პრევენციის მიზნით მათ მიერ გადახურულ სახურავებზე გამაგრებითი სამუშაოები შეასრულონ“, – ამბობს ახალციხის მუნიციპალიტეტის გამგებლის მოვალეობის დროებით შემსრულებელი მალხაზ ჟუჟუნაძე.

შეგახსენებთ, რომ ახალციხის მუნიციპალიტეტში სახურავების შეკეტება 2012 წლის ივლისში, ძლიერი სეტყვის შემდეგ დაიგეგმა. სტიქიის შედეგად დაზიანებული სახურავების შესაკეთებლად პრეზიდენტის ფონდიდან 3576546,16 ლარი გამოიყო. ამ თანხით 152 შენობა ნაგებობა (საერთო ფართობით 93105 მ2. მათ შორის ახალციხეში 93 და ქალაქ ვალეში 59 შენობა) წითლად შეღებილი რკინის ფირფიტებით გადაიხურა.

[თამარ თოთაძე, ახალციხე]