ახალციხის მუნიციპალიტეტის საკრებულოს თავმჯდომარემ ოლეგ სანდროშვილმა, დღეს, 3 აპრილს, თვითმმართველობის შენობაში, ცენტრალური და ადგილობრივი მედიისთვის სპეციალური ბრიფინგი გამართა, რომელზეც
განაცხადა, რომ მისი თანამდებობიდან ჩამოცილებისთვის, საკრებულოს რამდენიმე თანამშრომელზე, მიმდინარე წლის 27 მარტს ფინანსთა სამინისტროს საგამოძიებო სამსახურის სამცხე-ჯავახეთის სამმართველოში ზეწოლა განხორციელდა.
საქმე ეხება ახალციხეში, ასპინძის ქუჩაზე, N28 სახურავგადახდილი კორპუსის შეკეთების სამუშაოებს. ოლეგ სანდროშვილის განცხადებით, სამმართველოში „დაიბარეს“ ახალციხის მუნიციპალიტეტის გამგეობის ინფრასტრუქტურის განვითარებისა და ზედამხედველობის და გამწვანების სამსახურის სპეციალისტები: რევაზ მერაბიშვილი, გიორგი ქასრაშვილი, ბესარიონ მიქელაძე და ემზარ მღებრიშვილი და მერაბიშვილსა და ქასრაშვილს წერილობითი ჩვენებები ჩამოართვეს.
„საქმეზე სასაურველი ჩვენების მიღების მიზნით, რევაზ მერაბიშვილზე განხორციელდა ფსიქოლოგიური ზეწოლა. კერძოდ, „თითქოს“ ახალციხის მუნიციპალიტეტის საკრებულოს თავმჯდომარე ოლეგ სანდროშვილი ზეწოლას ახორციელებდა აღნიშნულ თანამშრომლებზე, იმ მიზნით, რათა მომხდარიყო მიღება-ჩაბარებებზე ხელის მოწერა, რის შედეგადაც შპს-ს ჩაერიცხებოდა შესრულებული სამუშაოს თანხა“, - განაცხადა სანდროშვილმა ბრიფინგზე.
ასპინძის ქუჩაზე მდებარე 28-ე კორპუსს სახურავი ძლიერმა ქარმა
2013 წლის 23 აპრილს გადახადა. კორპუსში 60 ოჯახი ცხოვრობს. ვის უნდა შეეკეთებინა სახურავი, თვეების განმავლობაში გამგეობასა და გუბერნიას შორის დაპირისპირების საგნად იქცა. კორპუსის გადახურვას
სამხარეო ადმინისტრაცია გამგეობას ავალდებულებდა, გამგეობა კი გუბერნიას. ორივე მხარეს ჰქონდა შესაბამისი არგუმენტები.
აღნიშნულ კორპუსს ახალშეცვლილი სახურავი ჰქონდა. ასპინძის 28-ე კორპუსი ერთ-ერთი იყო იმ 93 შენობა - ნაგებობიდან, რომელთაც სახურავები 2012 წლის აგვისტოში შეუცვალეს. სახურავების შეცვლას წინ ივლისში მომხდარი
ძლიერი სეტყვა უსწრებდა. სტიქიით დაზარალებული მოსახლეობის დასახმარებლად თანხა პრეზიდენტის ფონდიდან გამოიყო, გადახურვის სამუშაოებზე
3576546,16 ლარი დაიხარჯა. ვინაიდან სტიქია მთელს რეგიონს შეეხო, თანხას სამხარეო- ადმინისტრაცია განკარგავდა. ამიტომ ავალდებულებდა გამგეობა სახურავის შეცვლას გუბერნიას.
გუბერნიაში კი აცხადებდნენ, რომ ეს იყო ერთადერთი შემთხვევა, როცა ინფრასტრუქტურული სამუშაოებისთვის თანხა გუბერნიას ჩაერიცხა, ეს იყო მთავრობის გადაწყვეტილება, იმიტომ, რომ საქმე მთელს რეგიონს ეხებოდა. გუბერნატორის მაშინდელი მოადგილე, გელა დემეტრაძე აცხადებდა, რომ ვინაიდან ასეთ პროექტებში გუბერნიას გამოცდილება არ ჰქონდა, გაფორმებული იყო სამმხრივი ხელშეკრულება, რომლის თანახმად, დამკვეთი კი იყო სამხარეო ადმინისტრაცია, მაგრამ, ზედამხედველობას ახალციხის მუნიციპალიტეტის გამგეობა უწევდა. ამიტომ, სახურავის შეკეთებაზე პასუხისმგებლობა გამგეობას ეკისრებოდა.
დავა რამდენიმე თვეს გაგრძელდა. ამასობაში, კორპუსში მცხოვრებლები
ძლიერმა წვიმამ არაერთხელ ჩარეცხა. გარდა გამგეობა-გუბერნიის დავისა, კიდევ ერთი მიზეზი, რის გამოც გადახურვის გაჭიანურებას ხსნიდნენ,
ექსპერტიზის დასკვნა იყო. 2013 წლის 28 ივნისს საკრებულოს სხდომაზე
ცნობილი გახდა დასკვნა, რომლის მიხედვითაც, სახურავის დაზიანება მშენებელის შეცდომა არ იყო. საბოლოოდ, ოთხთვიანი დავისა და ლოდინის შემდეგ, პასუხისმგებლობა გამგეობამ აიღო.
გამგეობამ სახურავის გადასახურად ტენდერი 2013 წლის 22 ივლისს, 72,000 ლარზე გამოაცხადა. ტენდერი შპს „სამცხემ“, 54,800 ლარით მოიგო და
სამუშაოები დაიწყო. ხელშეკრულების თანახმად, მშენებელმა სამუშაოები ოქტომბერში დაასრულა.
[ნინო ნარიმანიშვილი, ახალციხე]