ახალციხეში ყველაზე ძველი სინაგოგის დაარსების 275 და განახლების 153 წლის იუბილე აღნიშნეს.
რაბათში, ისტორიულ უბანში, სტუმრებმა შეკრება 14:30 საათზე
დაიწყეს. ერთ-ერთ ყველაზე ძველ სინაგოგაში ისრაელიდან და თბილისიდან ჩამოსულმა ქართველმა ებრაელებმა შუადღის ლოცვა აღავლინეს.
ლოცვის დასრულების შემდეგ სინაგოგის ეზოში მოწვეულმა სტუმრებმა ადგილობრივებს და
ქართველ ებრაელებს იუბილე მიულოცეს. ღონისძიებას
კულტურის, ასევე,
ფინანსთა,
ლტოლვილთა და განსახლების მინისტრები დაესწრნენ. ახალციხეს სტუმრობდა განათლებისა და მეცნიერების მინისტრის მოადგილე
ლია გიგაური.
ჩამოსულ სტუმრებს მასპინძლობა ადგილობრივი თვითმმართველობისა და სამცხე–ჯავახეთის სამხარეო ადმინისტრაციის წარმომადგენლებმა გაუწიეს. ღონისძიება ახალციხის მერიის ორგანიზებით ჩატარდა.
„ეს არის ძალიან ღირშესანიშნავი თარიღი. რადგან ეს ეხება ორი ქვეყნის განსაკუთრებულ მეგობრობას, რომელიც მთელი მსოფლიოსთვის არის სამაგალითო. აქამდე არ ყოფილა შემთხვევა, რომ ქრთველებს და ებრაელებს ერთმანეთისთვის ეღალატოთ“, – ამბობს ახალციხი მერი გიორგი კოპაძე.
ახალციხეში გამართულ ღონისძიებას 150–მდე მოწვეული ქართველი ებრაელი დაესწრო, მათი უმეტესობა ისრაელიდან და თბილისიდან ჩამოვიდა.
„ხაიფის რაიონში ვცხოვრობთ. 42 წელია იქ ვარ. ყველას დიდი მადლობა, ვინც ამ ღონისძიების ორგანიზება ითავა, რომ გავიგე ახალციხეში რაც ხდებოდა, ჩემს მეგობრებთან ერთად ჩამოვედი. ბოლოს ოთხი წლის წინ ვიყავი და მოვინახულე ჩემი მშობლიური მხარე“, – ამბობს ანზორ თაფლაშვილი და ამატებს, რომ ყველაზე მეტად იმაზე წყდება გული, რომ ახალციხეში ებრაელები ფაქტობრივად აღარ ცხოვრობენ.
რელიგიის საკითხთა სახელმწიფო სააგენტოს თავმჯდომარემ ზაზა ვაშაყმაძემ აქცენტი ქვეყანაში არსებულ რესტავრირებულ სინაგოგებზე გააკეთა: „კარგია, რომ საქართველოში ბევრი სინაგოგა აღდგენილია და რესტავრაციას აღარ საჭიროებს“.
ქართველ ებრაელებს სინაგოგის იუბილე მიულოცეს სსხვადასხვა კონფესიის წარმომადგენლებმაც.
„გვიხარია ის, რომ საქართველოში ყველა ვართ ტოლერანტები და ვაფასებთ ერთმანეთის აღმსარებლობას.ერთობა და სიყვარული ჩვენს ქვეყანას ააღორძინებს“, – ამბობს საქართველოს მუფთი ბეგლარ ქამაშიძე.
მისალმების და მილოცვების შემდეგ საზეიმო ღონისძიება „ახალციხის ციხეზე“ გაგრძელდა, სადაც თვითნასწავლი მხატვრის, მიხეილ იაძის ნახატების და ასევე ახალციხის სამხატვრო სკოლის ნიმუშების გამოფენა მოეწყო. ასევე, გაიმართა ფურშეტიც.
„ახალციხის ციხეზე“ ქალაქის მერმა ქართულ–ებრაულ ურთიერთობებში შტანილი წვლილისთვის არაერთი სტუმარი დააჯილდოვა და სამახსოვრო საჩუქრები გადასცა.
საიუბილეო ღონისძება დღის ბოლოს კონცერტით დასრულდა, როემლიც მესხეთის პროფესიულ სახელმწიფო დრამატულ თეატრში გაიმართა.
ქართულ–ებრაული, 26 საუკუნოვანი მეგობრობისადმი მიძღვნილ კონცერტში მონაწილეობა ქართული ესტრადის ცნობილმა ვარსკვლავებმა მიიღეს. სცენაზე იცეკვეს სამცხე- ჯავახეთის სახელმწიფო უნივერსიტეტის ქორეოგრაფიული ანსამბლის"მესხეთის" და ახალციხის № 5 საჯარო სკოლასთან არსებული ქორეოგრაფიული ანსამბლის "ლომსიას”მოცეკვავებმა.
[თინათინ ზაზაძე, ახალციხე]