სინაგოგის იუბილეზე დაგეგმილი ღონისძიებების განრიგი

29 მაისს, ახალციხეში მთავრობის, დიპლომატიური კორპუსის წარმომადგენლებსა და ისრაელიდან მოწვეულ სტუმრებს ელოდებიან. მათი მიღება 14:00 საათზე ახალციხის სინაგოგაში, გურამიშვილის №90–ში გაიმართება. სინაგოგაში ჩატარდება ლოცვაც.

აქედან სტუმრები ადგილობრივი თვითმმართველობის წარმომადგენლებთან ერთად „ახალციხის ციხეზე“ გადაინაცვლებენ. აქ საზეიმო დახვედრა 15:00 საათზე დაიწყება. ღონისძიებაში მონაწილეობას ახალციხის ფოლკლორული ანსამბლი „მესხეთი“ და ასევე ადგილობრივი ქორეოგრაფიული ანსამბლი „მესხი ფრთოსანი“ მიიღბენ. სტუმრებს ახალციხის მერი გიორგი კოპაძე მიესალმება. ამის შემდეგ ციხეზე თვითნასწავლი მხატვრის, მიხეილ იაძის ნახატების და ასევე ახალციხის სამხატვრო სკოლის ნიმუშების გამოფენა მოეწყობა.

ფურშეტამდე, რომელიც განრიგით 16:00 საათზეა გაწერილი, სტუმრები „ახალციხის ციხის“ კომპლექსსა და მუზეუმს დაათვალიერებენ.

მოგვიანებით, 18:00 საათზე კი მესხეთის პროფესიულ სახელმწიფო დრამატულ თეატრში ქართულ–ებრაული, 26 საუკუნოვანი მეგობრობისადმი მიძღვნილი კონცერტი გაიმართება. მასში მონაწილეობას ქართული ესტრადის ცნობილი ვარსკვლავები მიიღებენ.

უძველესი სინაგოგის იუბილე ახალციხეში მერიის ინიციატივითა და ორგანიზებით იმართება. ღონისძიებისთვის ადგილობრივი ბიუჯეტიდან 30 ათასი ლარი იხარჯება.

შეგახსენებთ, რომ საქართველოში ერთადერთი უძველესი სინაგოგა 1863 წელსაა აშენებული. მასში, წლების განმავლობაში სალოცავად 400–მდე ებრაელი იკრიბებოდა. ახლა კი მას მხოლოდ ერთი მლოცველი სიმონ ლევიშვილი ჰყავს.

[sknews.ge]