ახალციხეში უძველესი სინაგოგის იუბილის აღნიშვნა დაიწყო [PHOTO]

ახალციხეში უკვე იმყოფებიან ებრაეული დელეგაციები, ასევე, საქართველოს ლტოლვილთა და განსახლების მინისტრი სოზარ სუბარი, კულტურის მინისტრი მიხეილ გიორგაძე, ფინანსთა მინისტრი ნოდარ ხადური, კულტურული მემკვიდრეობის დაცვის ეროვნული სააგენტოს გენერალური დირექტორ ნიკოლოზ ანთიძე. ასევე, ბადრი პატარკაციშვილის დედა ნათელა პატარკაციშვილი, ახალციხისა და ტაო–კლარჯეთის მიტროპოლიტი თეოდორე, დასავლეთ საქართველოს მუფთი ბეგლარ ქამაშიძე, ქრისტიანი, მუსლიმი და გრიგორიანული კონფესიის სხვა წარმომადგენლები.

იუბილეს არაერთი ცნობილი სახე ესწრება, მათ შორის, სახალხო არტისტი, ქორეოგრაფი ფრიდონ სულაბერიძე, ანსამბლ "ერისიონის" ხელმძღვანელი ჯემალ ჭკუასელი.

სინაგოგაში შეკრებილი არიან სამცხე–ჯავახეთის გუბერნიისა და ადგილობრივი თვითმმართველობების წარმომადგენლები.

ქალაქ ახალციხის მერის გიორგი კოპაძის განმარტებით, იუბილეზე ჯამში 250 სტუმარს ელიან.

სინაგოგაში უკვე შესრულდა ნაშუადღევის ლოცვა – მინხა.

რამდენიმე წუთის წინ, შეკრებილებს სინაგოგის იუბილე ტელეფონით მიულოცა ბიძინა ივანიშვილმა. მისი სატელოფონო მილოცვა სინაგოგასთან დამონტაჟებული დინამიკებიდან ისმოდა.

სინაგოგიდან სტუმრები ახალციხის ციხეში გადაინაცვლებენ, სადაც გამოფენები და სხვა ღონისძიებებია დაგეგმილი.













[თინათინ ზაზაძე, ნინო ნარიმანიშვილი, ადიგენი]