სინაგოგის იუბილეს ახალციხეში 150 ქართველი ებრაელი ესწრება

ახალციხეში, რაბათის უბანში, უძველესი სინაგოგის დაარსების 275 და განახლების 153 წლის იუბილესთან დაკავშირებული ღონისძიებები 14:00 საათზე, ებრაელების ნაშუადღევის ლოცვით დაიწყო.

„20 წელია რუსეთში ვცხოვრობ. მამაჩემი წარმოშობით საქართველოდანაა, ახალციხიდან. ხშირად ჩამოვდივარ საქართველოში. ეს დღე ჩემთვის ძალიან მნიშვნელოვანია, ყველაფერი რაც უკავშირდება ისრელს და საქართველოს, ჩემთვის ძალიან ძვირფასია“, – ამბობს ქართველი ებრაელი თამარ მოშიაშვილი.

„საქართველოში ებრაელები ერთმუჭად ვართ შეკრული“, – გვეუბნება ეთერ კოკიელოვი, რომელიც ამ დღისთვის ახალციხეში თბილისდან ჩამოვიდა“, – „მიხარია, რომ დღეს აქ ლოცვა ჩატარდა და შესაძლებლობა მქონდა დავსწრებოდი“.

ანზორ თაფლაშვილი ახალცხეში ისრაელიდან ჩამოვიდა.

„ხაიფის რაიონში ვცხოვრობთ. 42 წელია იქ ვარ. მივესალმები ამ ძალიან კარგ ინიციატივას. ყველას დიდი მადლობა, ვინც ამ ღონისძიების ორგანიზება ითავა, რომ გავგე ახალციხეში რაც ხდებოდა, ჩემს მეგობრებთან ერთად ჩამოვედი. ბოლოს ოთხი წლის წინ ვიყავი და მოვინახულე ჩემი მშობლიური მხარე“, – ამბობს იგი და ამატებს, რომ ყველაზე მეტად იმაზე წყდება გული, რომ ახალციხეში ებრაელები ფაქტობრივად აღარ ცხოვრობენ.

საზეიმო ღონისძიებისთვს თბილისიდან ჩამოვიდა კლუბ „26 საუკუნის“ ხელმძღვანელი ისტორიის მეცნიერებათა დოქტორი ზაირა დავარაშვილიც: „ქართველი ებრაელი გახლავართ. ჩემთვის ყველაფერი ძვირფასია, რაც საქართველოში ებრაელობასთან და ქართველობასთან არის დაკავშირებული. დღევანდლამდე ისე მოვედი, რომ ჩემი ოჯახის ტრადიციები არ დარღვეულა და ბუნებრივია, რომ დღევანდელი სასახელო დღე ერთ-ერთ სახელოვან ფურცლად ჩაიწრება ქართველთა და ებრაელთა მრავალსაუკონოვან ისტორიაში“.

ახალციხეში სტუმრად იმყოფება აშტოდიის ვიცე მერი მოშე ბოთერაშვილი. სწორედ ამ ქალაქში ცხოვრობენ ყველაზე მეტი ქართველი ებრაელები.

შეგახსენებთ, რომ დღეს ახალციხეში უძველესი სინაგოგის დაარსების 275 და განახლების 153 წლისთავი აღინიშნება. საიუბილეო ღონისძიებებს არაერთ ადგილობრივ სტუმართან ერთად, ებრაული დელეგციები, მინისტრთა კაბინეტი და სხადასხვა რელიგიური კონფესიების წარმომადგენლები სტუმრობენ.










[თინათინ ზაზაძე, ახალციხე]