‘ახალციხის ციხეზე’ თანამშრომლები ისევ დროებით დააბრუნეს

„ახალციხის ციხიდან“ გათავისუფლებული შვიდი გიდი და ერთი მეთვალყურე სამსახურებში დააბრუნეს. ციხეზე მხოლოდ დარბაზის ყოფილი მეთვალყურე ჯუნა ნათენაძე აღარ აგრძელებს მუშაობას. მან სამსახურიდან გათავისუფლების გამო სასამართლოში იჩივლა და როგორც ციხის ადმინისტრაციაში აცხადებენ, მის სამსახურში დაბრუნების შესახებ განკარგულებას ელოდებიან.

ასევე, ციხემ ერთი ახალი თანამშრომელი, ელექტროტექნიკოსი მიიღო. აპრილიდან ტექნიკურ დარგში კიდევ ორ თანამშრომელს დაიმატებენ, თუმცა, კონკრეტულად რა მიმართულებით ჯერ, არ იციან.

„ახალ თანამშრომლებს სეზონურად, ოქტომბრამდე ვიმატებთ“, – ამბობს „ახალციხის ციხის“ საზოგადოებასთან ურთიერთობის სამსახურის წარმომადგენელი ლილი გოზალიშვილი.

რაც შეეხება უკან დაბრუნებულ გიდებს, მათ ხელშეკრულებები პირველი მარტიდან გაუფორმდათ, თუმცა ისევ ვადიანი – 31 დეკემბრამდე.

„მოვაწერეთ ამ ვადიან ხელშეკრულებებს ხელი. ველოდებით როგორ განვითარდება მოვლენები, თუ იგივე განმეორდა და სამსახურიდან ვადის გასვლის გამო გაგვათავისუფლებენ, გავასაჩივრებთ“, – აცხადებენ „ახალციხის ციხის“ გიდები.

მათი თქმით, იმ თანამშრომლებს, რომლებიც ციხიდან 2015 წლის ბოლოს დაითხოვეს, გასაჩივრება სურდათ: „61–ე დღეს მივედით იურისტთან და გვითხრა, რომ ამ ვადაში სასამართლოში გასაჩივრებული საქმეების შესახებ, რა პრაქტიკა არსებობდა ეს უნდა მოეკვლია ჯერ. შესაძლოა სასამართლოში სარჩელი ჩვენც შევიტანოთ“.

მათგან განსხვავებით, მუზეუმის დარბაზის მეთვალყურე ჯუნა ნათენაძემ სასამართლოს ვადაში მიმართა და პროცესი მოიგო.

თუმცა, თუ ამჟამად უკან დაბრუნებულ ციხის თანამშრომლებს, ხელშეკრულების შეწყვეტის გამო სამსახურიდან ისევ გაათავისუფლებენ, მათი უკან დაბრუნების საფუძველი სამართლებრივად უვადო ხელშეკრულებები ვეღარ იქნება, როგორც ეს ჯუნა ნათენაძის შემთხვევაში იყო.

მიუხედავად იმისა, რომ ყველა გათავისუფლებული, გარდა ერთისა, ნათენაძის მსგავსად ციხეზე გახსნის დღიდან მუშაობდა.

„შეცდომა დაუშვეს იმაში, რომ მაშინ არ გაასაჩივრეს, ახლა კი ხელშეკრულებებში წყვეტა დაუფიქსირდათ, ამდენად მათი ხელშეკრულებები უვადოდ ვეღარ ჩაითვლება“, – აცხადებს ჯუნა ნათენაძის ადვოკატი ეკა აბაშიძე და ამატებს, რომ მისი აზრით, ციხეს უკან დაბრუნებულ თანამშრომლებთან უვადო ხელშეკრულებები უნდა გაეფორმებინა.

„არ ვიცი რატომ დაიდო ვადიანი ხელშეკრულებები ისევ, ან მომავალში რა იქნება, ხელმძღვანელმა ასე გადაწყვიტა“, – ამბობს „ახალციხის ციხის“ იურისტი მარინე გოგოლაძე.

შეგახსენებთ, რომ „ახალციხის ციხიდან“ 9 თანამშრომელი გაათავისუფლეს, აქედან 7 გიდი და ორი მეთვალყურე. მიზეზი ფინანსების სიმწირე და ტურისტების ნაკლებობა იყო, თუმცა მათთან ხელშეკრულებების გაწყვეტის შემდეგ ციხემ თანამშრომლებს ხელფასები გაუზარდა.

[თამუნა უჩიძე, ახალციხე]