თანამშრომელი, რომელმაც ‘ახალციხის ციხეს’ სასამართლო მოუგო, სამსახურში დაბრუნებას არ აპირებს

ახალციხის რაიონული სასამართლოს გადაწყვეტილება ჯუნა ნათენაძის სამსახურში აღგენისა და განაცდური საათების ანაზღაურების შესახებ, ძალაში შევიდა. სააღსრულებო დოკუმენტი ახალციხის ციხემ 6 აპრილს მიიღო. 7 აპრილს კი დეკემბრის თვეში გათავისუფლებული თანამშრომლის დანიშვნის ბრძანება დაწერა. „ახალციხის ციხის“ ადმინისტრაციამ ჯუნა ნათენაძეს განაცდური საათებიც უნდა აუნაზღაუროს.

„ბუღალტერიას თავისი პროცედურა აქვს, დაანგარიშდება და აუნაზღაურდება თანხა, ვადა განსაზრვრული არ არის“, – ამბობს „ახალციხის ციხის“ იურისტი მარინე გოგოლაძე.

ჯუნა ნათენაძე ამბობს, რომ სამცხე–ჯავახეთის მუზეუმის დარბაზის მეთვალყურედ მუშაობის გაგრძელებას აღარ აპირებს: „დარჩენას ვგეგმავდი, მაგრამ გადავიფიქრე. ვწერ განცხადებას და მოვდივარ. ახალმა სამსახურმა მეტად დააფასა ჩემი შესაძლებლობები“.

„ახალციხის ციხეში“ ამბობენ, რომ ჯუნა ნათენაძეს ეს გადაწყვეტილება მათთვის ცნობილი არ არის.

„წასვლის შესახებ ოფიციალურად არ მოუმართავს“, – გვეუბნება იურისტი.

შეგახსენებთ, რომ ჯუნა ნათენაძე სამსახურიდან 2015 წლის 31 დეკემბერს გაათავისუფლეს. გათავისუფლებულმა თანამშრომელმა ახალციხის რაიონულ სასამრთლოს მიმართა და პროცესი მოიგო.

[თაკო ფეიქრიშვილი, ახალციხე]