ახალციხის ციხის გიდები. ფოტო: 'სამხრეთის კარიბჭე'. 2015 წლის ოქტომბერიმომავალი, 2016 წლის იანვრიდან, „ახალციხის ციხეზე“, 9 გიდს, 3 მეთვალყურესა და 4 მარეგულირებელს ხელშეკრულებას აღარ გაუგრძელებენ. ადმინისტრაციაში განმარტავენ, რომ მიზეზი ცოტა ტურისტი და არასაკმარისი თანხაა.
„ოქტომბერში დაუმთავრდათ ხელშეკრულებები, მაგრამ გამოინახა თანხა და გავუგრძელეთ. ახლა, ინავრიდან უნდა წავიდნენ და მოვიდნენ მაშინ, როცა ტურისტები გვეყოლება. ექვს გიდს ვტოვებ, მაგრამ ახლა ზამთარში ციხეზე ექვსი ვიზიტორიც არ გვყავს. დანარჩენებიც რომ დავიტოვო, პასუხს ხომ მომთხოვენ, ხელფასს რაში უხდითო“, – ამბობს ახალციხის ციხის დირექტორის მოვალეობის შემსრულებელი ილია სიდამონიძე.
მისი თქმით, თანამშრომლების ნაწილისთვის ზამთრის სეზონზე ხელშეკრულების შეწყვეტა ისეთ ობიექტზე, როგორიც „ახალციხის ციხეა“, ჩვეულებრივი პროცესია: „ყველ წელს ასე ხდება. ძალიან კარგი გიდები გვყავს და დაბრუნდებიან აპრილიდან. მათ ამის შესახებ იციან“.
გიდებისგან განსხვავებით, გაზაფხულიდან ციხეზე სამუშაოდ მუზეუმის დარბაზის ორი მეთვალყურე, სავარაუდოდ, აღარ დაბრუნდება.
„ჩვენი გაშვების მიზეზი ის არის, რომ ციხეს ბიუჯეტი აღარ აქვს. არადა გასულ წლებთან შედარებით, წელს მეტი ვიზიტორი იყო. არავის დაცვა არ მჭირდება, მე ჩემი ქვეყნის კონსტიტუცია დამიცავს“, – ამბობს მეთვალყურე ჯუნა ნათენაძე.
შეკითხვაზე სასამართლოში ჩივილს ხომ არ აპირებს, გვპასუხობს: „ჯერ არ ვიცი“.
მუზეუმის სხვა თანამშრომლები, რომლებსაც ხელშეკრულებები უწყდებათ, „სამხრეთის კარიბჭესთან“ არ საუბრობენ.
გიდები ამბობენ, რომ ახალციხის მერთან აპირებენ შეხვედრას, შესაძლოა ამან ვითარება შეცვალოს, ამიტომ წინასწარ ვერაფერს იტყვიან: „დღეს გვინდოდა შევხვედროდით და ვერ მოხერხდა. არ ვიცით შეხვედრა როდის შედგება“.
შეძლებს თუ არა ახალციხის მერია ციხეს სუბსიდია გაუზარდოს იმისთვის, რომ თანამშრომლებს ზამთარში სახლში წასვლა არ მოუხდეთ, უცნობია. სიდამონიძეს პროგნოზირება უჭირს, ახალციხის მერიიდან კი ამ შეკითხვაზე პასუხი ჯერ არ მიგვიღია.
რაც შეეხება იმ ორ მეთვალყურეს, რომლების დაბრუნებაც ციხეზე გაზაფხულიდან საეჭვოა, სიდამონიძე ამბობს: „თუ რაიმე თანხა გამოინახა, დავაბრუნებთ. მათ ხელფასს ჩვენ ვუხდით და არა მუზეუმი. როგორც ვიცი, მუზეუმის ხელმძღვანელს ციური ლაფაჩს გაგზავნილი აქვს მოთხოვნა, რომ შტატები დაუმატონ, მას ციტადელზე გამოკეტილი აქვს ხელნაკეთი ნიმუშების ოთახი იმის გამო, რომ თანამშრომელი არ ჰყავს“.
მუზეუმს რომ კადრები ნამდვილად სჭირდება, ამას სამცხე–ჯავახეთის მუზეუმის დირექტორი ციური ლაფაჩიც ადასტურებს. იგი ამბობს, რომ მეთვალყურეების საქმის შეთავსება სხვა თანამშრომლებისთვის მოუხდება: „მჭირდება ისტორიკოსიც, შტატი რომ მქონდეს, ავიყვანდი მაგისტრანტს ან დოქტორანტს, მაგრამ ამ საკითხის გადაწყვეტა სახელმწიფოს საქმეა, ეს ჩემზე დამოკიდებული არ არის“.
„ახალციხის ციხე“ მომავალი წლისთვის ქალაქის ბიუჯეტიდან სუბსიდიას ისევ 200 000 ლარს მიიღებს. შეიცვლება თუ არა რაიმე გიდებთან მერის შეხვედრის შემდეგ, უცნობია. აქვე აღსანიშნავია, რომ ეს ამ თემაზე მერისა და ციხის თანამშრომლების
პირველი შეხვედრა არ იქნება.
შეგახსენებთ, რომ მას შემდეგ რაც „ახალციხის ციხე“ გაიხსნა,
ყველა ზამთრის სეზონზე ციხეზე თანამშრომლების ნაწილს ხელშეკრულებებს გაზაფხულამდე უწყვეტენ.
„ასე მხოლოდ პირველ წელს არ მომხდა, რადგან მაშინ ციხეს ბიუეჯტიდან 700 000 ლარზე მეტი დაფინანსება ჰქონდა, ახლა კი ეგრე აღარაა“, – ამბობს სიდამონიძე.
2015 წლის 12 ოქტომბერი, ახალციხის მერისა და გიდების შეხვედრა. ფოტო: მერიის ფეისბუქის გვერდი[თამუნა უჩიძე, ახალციხე]