გათავისუფლებულმა თანამშრომელმა ახალციხის ციხეს სასამართლო დავა მოუგო

შეგახსენებთ, ციხის ყოფილი თანამშრომელი ჯუნა ნათენაძე გათავისუფლების ბრძანების ბათილად ცნობას, ასევე სამსახურში აღდგენასა და გათავისუფლების დღიდან განაცდური საათების ანაზღაურებას ითხოვდა.

გარდა ამისა, მანამდე, ვიდრე სამსახურში აღდგებოდა, ჯუნა ნათენაძე ითხოვდა ასანაზღაურებელი თანხის 0.07 პროცენტს ყოველ ვადაგადაცილებულ დღეზე.

ნათენაძის ინტერესებს დემოკრატ მესხთა კავშირის ადვოკატი სოსო ხითარიშვილი იცავდა.

ახალციხის რაიონულ სასამართლოში ამ საქმეზე პროცესი დღეს გაიმართა. მოსამართლემ გადაწყვეტილება რამდენიმე წუთის წინ გამოაცხადა.

შეგახსენებთ, რომ ჯუნა ნათენაძე სამსახურიდან 2015 წლის 31 დეკემბერს გაათავისუფლეს. მასთან ერთად გაათავისუფლეს კიდევ რვა თანამშრომელი. გათავისუფლების მოტივად არატურისტული სეზონი და ბიუჯეტში თანხების სიმწირე დასახელდა, თუმცა, მათი გათავისუფლების შემდეგ ციხის ადმინისტრაციამ ხუთ თანამშრომელს ხელფასი გაუზარდა.

ნათენაძე აცხადებდა, რომ უკანონოდ გაათავისუფლეს და 18 იანვარს ახალციხის რაიონულ სასამართლოში სამოქალაქო სარჩელი შეიტანა.

[ნინო ნარიმანიშვილი, თამუნა უჩიძე, ახალციხე]