‘ახალციხის ციხემ’ 16 თანამშრომელი სამსახურიდან დაითხოვა

„ახალციხის ციხის“ ადმინისტრაციამ მარეგულირებლები და გიდები გაზაფხულამდე სახლში გაუშვა, მეთვალყურეებს კი ხელშეკრულებები აღარ გაუგრძელდებათ.

„ოთხი იანვრიდან სამსახურში აღარ მოვალთ. თუ დამთვალიერებლები შემოვლენ და თანხა იქნება, ხელშეკრულებებს გაგიგრძელებთო გვითხრეს“, – ამბობენ გიდები.

გაზაფხულიდან გიდებს რომ ხელშეკრულებები გაუგრძელდებათ, ამას „ახალციხის ციხის“ დირექტორის მოადგილე გიორგი ჩერქეზიშვილიც ადასტურებს. დღეს ამის შესახებ თათბირზე თანამშრომლებს თავად განუცხადა.

მეთვალყურეები კი აცხადებენ, რომ მათ გაზაფხულიდან ხელშეკრულებები აღარ გაუგრძელდებათ.

შეგახსენებთ, 2016 წლის იანვრიდან, „ახალციხის ციხეზე“, 9 გიდს, 3 მეთვალყურესა და 4 მარეგულირებელს ხელშეკრულებას აღარ გაუგრძელებენ. ადმინისტრაციაში განმარტავენ, რომ მიზეზი ცოტა ტურისტი და არასაკმარისი თანხაა.

[თამუნა უჩიძე, ახალციხე]