'ახალციხის ციხიდან' 13 თანამშრომელი გაათავისუფლეს

„ახალციხის ციხიდან“ ის თანამშრომლები გაათავისუფლეს, რომლებიც წყალმომარაგების, ელექტროგაყვანილობისა და გამწვანების მიმართულებით მუშაობდნენ.

მალხაზ გოგოლაძე ახალციხის ციხეში, მისი მშენებლობის დროიდან მუშაობდა: „წყლის მილების დაქსელვაზე ვმუშაობდი, ვიცი სად რა მილი გადის და როგორ. ამიტომ გახსნის შემდეგაც სამუშაოდ ამ მიმართულებით დამტოვეს“.

მისი თქმით, ციხეზე მასთან ერთად ავზებს კიდევ სამი თანამშრომელი აკონტროლებდა: „ოთხივე გაგვათავისუფლეს. მე ექვსთვიანი ხელშეკრულება მქონდა და ვადა 31 დეკემბერს ამომეწურა. გვითხრეს, გაზაფხულიდან ისევ მიგიღებთო და არ ვიცი რამდენად მართალია“.

გოგოლაძე ამბობს, რომ თანამშრომლები ბიუჯეტში თანხის ნაკლებობის გამო გაათავისუფლეს. ამის შესახებ მათ ციხის უფროსის დროებით მოვალეობის შემსრულებელმა ილია სიდამონიძემ განუცხადათ: „ხელფასი 300 ლარი მქონდა და ხელზე 250-ს ვიღებდი. იმას ვინც შტატში იყო, ხელფასი 420 ლარი ჰქონდა“.

ციხიდან ჯამში 13 თანამშრომელი გაათავისუფლეს.

„13 თანამშრომელს 31 დეკემბერს დაუმთავრდა ხელშეკრულების ვადა და ზამთრის სეზონის გამო აღარ გაუგრძელდათ. ახლა ტურისტული სეზონი არ არის და გაზაფხულიდან ისევ დააბრუნებენ. საჭიროების შემთხვევაში, შესაძლოა, მათი ნაწილი გაზაფხულამდეც დააბრუნონ“, – განმარტავს „ახალციხის ციხის“ საზოგადოებასთან ურთიერთობის სამსახურის უფროსი ლილი გოზალიშვილი.

ახალციხის მერი გიორგი კოპაძე „ახალციხის ციხეში“ გაბერილი შტატებისა და მოსალოდნელი შემცირებების შესახებ მერიაში მუშაობის დაწყების პირველივე დღიდან საუბრობდა. თუმცა, როგორც „სამხრეთის კარიბჭეს“ მერიაში განუმარტეს, ტექნიკური პერსონალის გათავისუფლება, ციხეზე გაბერილი შტატების შემცირებას არ უკავშირდება და ამ თანამშრომლებს სამსახურში ეტაპობრივად დააბრუნებენ.

[თამუნა უჩიძე, ახალციხე]