ასპინძასა და ადიგენში სტიქიის შედეგებს თავიდან სწავლობენ

ასპინძის მუნიციპალიტეტს სტიქიამ მიდინარე წლის 12 მაისს, ადიგენს კი 13 მაისს შეუტია. 8 ივნისს ადიგენში სტიქია განმეორდა. ორივე მუნიციალიტეტში სტიქიის მეორე დღესვე შეიქმნა სპეციალური სამუშაო ჯგუფები, რომლებმაც ზარალის ოდენობა დაითვალეს.

მუნიციპალიტეტებმა მონაცემები საქართველოს რეგიონული განვითარების სამინისტროს გადაუგზავნეს. ადგილზე დათვლილი მონაცემებით, ასპინძამ 1.343.022 ლარი იზარალა; ადიგენმა პირველი სტიქიისას 135.701 ლარის, სტიქიის განმეორებისას კი 164.000 ლარის ზარალი მიიღო.

საქართველოს რეგიონული განვითარებისა და ინფრასტრუქტურის სამინისტროში განმარტავენ, რომ ასპინძიდან მიღებული მასალა არასრულყოფილი იყო და შესასწორებლად უკან გადააგზავნეს. სამინისტრომ ასპინძის ხელმძღვანელობას გამოსასწორებლად 10 დღის ვადა მიეცა.

„არ იყო დამადასტურებელი დაკუმენტაცია იმ მოთხოვნების, რაც მოითხოვეს, უბრალოდ იყო ტექსტური ნაწილი. აქედან გამომდინარე, ჩვენ გვაქვს სპეციალური ფორმატი, რომელი ფომატითაც ვითხოვთ ინფრომაციას შუამდგომლობისთვის და ის უკვე დავუბრუნეთ ასპინძის მუნიციპალიტეტს შენიშვნებით. ველოდებით ხელახლა მათგან გამოხმაურებას“, – განმარტავს ინფრასტრუქტურის დეპარტამენტის განვითარების უფროსი ავთანდილ სუდაძე.

მისივე თქმით, ის ნაწილი, რაც ნაპირსამაგრ სამუშაოებს შეეხებოდა, საავტომობილო გზების დეპარტამენტის ნაპირდაცვის სამსახურს გადასცეს: „აღნიშნული სამსახურის თანამშრომლები მიმდინარე კვირაში ადგილზე შეისწავლიან მდგომარეობას და კომპეტენტურ პასუხს მოგვაწვდიან“.

რაც შეეხება ადიგენს, 13 მაისის სტიქიით მიყენებული ზარალის აღმოსაფხვრელი სამუშაოები მუნიციპალიტეტის ხელმძღვანელობამ შესაძლოა უკვე დაიწყოს. 8 ივნისს მომხდარი სტიქიის შედეგები კი, ასპინძის მსგავსად, სრულყოფლი არ აღმოჩნდა და ადიგენსაც უკან დაუბრუნდა.

„პირველ შემთხვევაში უკვე ვუშუამდგომლეთ. მთავრობის განკარგულებაც არის გამოსული და ადიგენის მუნიციპალიტეტს უკვე შეუძლია აღმოფხვრის სამუშაოები დაიწყოს. რაც შეეხება 8 ივნისის სტიქიის შედეგებს, არ იყო კორექტული დოკუმენტაცია, არ დგინდებოდა ზარალი და შედეგები და ამიტომ გამოსასწორებლად გადავაგზავნეთ “, – განმარტავს ავთანდილ სუდაძე.

ადიგენის მუნიციპალიტეტის გამგებლის დროებით მოვალეობის შემსულებელი ზაქარია ენდელაძე განმარტავს, რომ 13 მაისის სტიქიის შედეგების აღმოსაფხვრელად სახელმწიფო ბიუჯეტიდან დაახლოებით 96.000 ლარი გამოიყოფა: „პირველი სტიქიის დროს ზარალის ოდენობა ფაქტიურად მთლიანად დაფინანსდა , რაც შეეხება მეორე სტიქიის შედეგებს, დღეს ჩავასწორებთ და სამინისტროში გადავაგზავნით“.

შეგახსენებთ, რომ 12 მაისს წვიმამ, სეტყვამ და ღვარცოფმა დაბა ასპინძა და ხუთი სოფელი: დამალა, ოშორა, იდუმალა, ასწყვიტა და ოთა დააზიანა. 13 მაისს კი ძლიერმა წვიმამ ადიგენის მუნიციპალიტეტში ჭეჭლის, მოხის, ფხეროს, უდისა და ბოლაჯურის ტერიტორიულ ორგანოებში შემავალი სოფლები დააზარალა.

[თინათინ ზაზაძე, ახალციხე]