ადიგენში სტიქიით დაზიანებული გზების მოსაწესრიგებლად 30 ათასი ლარი დაიხარჯება

ადიგენის მუნიციპალიტეტის გამგეობა სტიქიის შედეგად მიყენებული ზარალის დათვლას ასრულებს. უკვე გარკვეულია თუ რა ოდენობის თანხა დასჭირდება ძლიერი წვიმისგან სოფლებში დაზიანებული გზების შეკეთებას.

როგორც ადიგენის მუნიციპალიტეტის გამგეობაში განმარტავენ, იმ სოფლებში, სადაც სტიქიამ გზები დააზიანა, აღდგენითი სამუშაოები უკვე დაწყებულია, რისთვისაც ადგილობრივი ბიუჯეტის სარეზერვო ფონდიდან 30 ათასი ლარი დაიხარჯება.

„დაზიანებული გზების შესაკეთებლად თანხა უკვე გამოვყეთ, აღდგენითი სამუშაოებიც დაწყებულია“, – ამბობს ადიგენის მუნიციპალიტეტის გამგებლის მოადგილე არსენ ბალახაშვილი.

თუ რა ოდენობის ზარალი მიადგა ადიგენის მუნიციპალიტეტს სოფლის მეურნეობის კუთხით ამ ეტაპზე უცნობია, როგორც არსენ ბალახაშვილი ამბობს, ამ მიმართულებით ზარალის დათვლა ისევ მიმდინარეობს: „სოფლის – მეურნეობის კუთხით ზარალის დათვლა ჯერ კიდევ მიმდინარეობს, სავარაუდოდ კვირის ბოლოს გვეცოდინება თუ რა ოდენობის ზარალი მიადგა ამ კუთხით მუნიციპალიტეტის სოფლებს“.

შეგახსენებთ, რომ სტიქიამ ადიგენის მუნიციპალიტეტს ოთხჯერ შეუტია. 3 ივნისს მოსულმა ძლიერმა სეტყვამ და ქარმა ადიგენის მუნიციპალიტეტის ორი სოფელი უდე და აბასთუმანი დააზარალა. სტიქიამ სასოფლო–სამეურნეო სავარგულები და სოფლის შიდა გზები დააზიანა.

დაახლოებით ერთ კვირაში, 11 ივნისს, სტიქიამ ადიგენის მუნიციპალიტეტის კიდევ ხუთი სოფელი, დიდი და პატარა სმადა, ენთელი, ლელოვანი და ამხერი დააზარალა. ძლიერმა სეტყვამ და წვიმამ სასოფლო – სამეურნეო სავარგულები და ინფრასტრუქტურა დააზიანა.

18 ივნისს კი უხვმა ნალექმა ადიგენის მუნიციპალიტეტის 7 სოფლის, უდის, იმერთუბანის, დაბა ადიგენის, საღრძეს, იჯარეთის, ჩორჩანის და ზანავის მისასვლელი გზები დააზიანა. მოვარდნილი ღვარცოფი სასოფლო – სამეურნეო სავარგულებში შევარდა და მოსახლეობის დიდი ნაწილის ნათესები გაანადგურა.

მეოთხედ სტიქიამ, 20 ივნისს სოფელი ვარხანი დააზარალა. ძლიერი წვიმის გამო ადიდებულმა ღელემ ადგილობრივების ბაღები და ნათესები დატბორა.

[მანანა სარაშვილი, ადიგენი]