ადიგენის მუნიციპალიტეტს სტიქიამ 135.701 ლარის ზარალი მიაყენა

ძლიერმა წვიმამ ჭეჭლის, მოხის, ფხეროს, უდისა და ბოლაჯურის ტერიტორიულ ორგანოებში შემავალი სოფლები დააზარალა.
სტიქიის შემდეგ შექმნილმა სპეციალურმა კომისიამ, რომელსაც მუნიციპალიტეტის საკრებულოს თავმჯდომარე გივი ენდელაძე ხელმძღვანელობს, ზარალი ორი მიმართულებით დაითვალა: ინფრასტრუქტურული და სოფლის მეურნეობის კუთხით.

სოფლის მეურნოების მხრივ ზარალის ოდენობა 39.000 ლარს შეადგენს. სტიაქიამ 4 ჰა. მიწის ნაკვეთი სრულიად გაანადგურა. დაიტბორა სამი სახლი, თუმცა მნიშვნელოვნად არ დაზიანებულა.

„4 ჰექტარზე საერთოდ მოსავალს ვერ მივიღებთ. სტიქიამ ნაკვეთებში ქვა-ღორღი შეიტანა, ინერტული მასალით დაფარა. ზოგ ადგილზე მდინარემ საერთოდ წაიღო ნათესი. ამ ტერიტორიაზე წელს არაფერი დაითესება. ზოგ ნაკვეთს წყალმა გადაუარა, თუმცა ამ შემთხვევაში ნათესი გადარჩა და ფეხზე წამოდგება“, - ამბობს ადიგენის მუნიციპალიტეტის გამგეობის ეკონომიკისა და ინფრასტრუქტურის განვითარების სამსახურის წამყვანი სპეციალისტი, მუნიციპალური ქონებისა და მიწის მართვის საკითხებში გურამ ბოჩიკაშვილი.

სტიქიის შედეგად დაზიანდა სოფლებში მისასვლელი გზები, ხიდები,სარწყავი არხები და მილხიდები. საერთო ჯამში ინფრასტრუქტურულმა ზარალმა ადიგენში 96,701 ლარი შედგინა.

ადიგენის მუნიციპალიტეტის გამგეობის ეკონომიკისა და ინფრასტრუქტურის განვითარების სამსახურის ხელმძღვანელმა გოდერძი სხირტლაძემ მონაცემები რეგიონული განვითარებისა და ინფრასტრუქტურის სამინისტროში 23 მაისს წარადგინა: „მინისტრი დაადებს რეზოლუციას და შემდეგ ალბათ განიხილავენ. ეს უკვე სამინისტროს პრეროგატივაა“.

ადიგენის მუნიციპალიტეტის საკრებულოში განმარტავენ, რომ მწირი ბიუჯეტის გამო ადგილობრივი ბიუჯეტიდან თანხები ვერ გამოიყოფა, გარდა იმის, რომ ახლა საარჩევნო პერიოდია, ბიუჯეტს საკმარისი თანხებიც არ აქვს. შესაბამისად, როგორ დაეხმარებიან დაზარალებულებს, ამ ეტაპზე უცნობია.

[თინათინ ზაზაძე, ადიგენი]