ბორჯომში სტიქიის შედეგებს ჯერ კიდევ ითვლიან

„სტიქიის შემდეგ, მოქალაქეთა მიერ შემოსული განცხადებების ადგილზე გაცნობისა და აღწერისათვის, მუნიციპალიტეტმა მოიწვია კერძო აუდიტი, რომელთანაც ხლშეკრულება გაფორმდა“, – განაცხადეს ბორჯომის მუნიციპალიტეტის გამგეობის საზოგადოებასთან ურთიერთობის სამსახურში.

მათივე ინფორმაციით, მოქალაქეების მხრიდან განცხადებების მიღება გასულ პარასკევს, 12 აგვისტოს დასრულდა: „შემოსულია 250 წერილი, რომელსაც აუდიტი ადგილზე ეტაპობრივად სწავლობს“.

5 აგვისტოს სტიქიის შედეგების აღმოსაფხვრელად ბორჯომის მუნიციპალიტეტის გამგეობის სარეზერვო ფონდიდან 294. 000 ლარი გამოიყო, რომელიც დაზიანებული ინფრასტრუქტურის აღდგენას მოხმარდება.

„მიმდინარეობს 17 მრავალბინიანი შენობის სახურავისა და 2 საყრდენი კედლის რეაბილიტაცია, ასევე ნიკოლაძის ქუჩაზე ღელის გაწმენდა“, – ამბობს საზოგადოებასთან ურთიერთობის წარმომადგენელი ლონდა ფილიშვილი.

რა ოდენობის ზარალი მიადგა მუნიციპალიტეტს, ჯერ დადგენილი არ არის.

„აუდიტის დასკვნის საფუძველზე გადხდება ცნობილი მიყენებული ზარალის ზუსტი ოდენობა. გადაწყდება, ასევე როგორ მოხდება მოქალაქეთა დაკმაყოფილება“, – განმარტავს ლონდა ფილიშვილი.

შეგახსენებთ, რომ სამცხე–ჯავახეთს სტიქიამ 4 და 5 აგვისტოს შეუტია. ძლიერმა წვიმამ და სეტყვამ ქალაქი ახალციხე და ბორჯომის მუნიციპალიტეტის დააზარალა.
[თინათინ ზაზაძე, ბორჯომი]