6 ივლისის სტიქიის შედეგად ახალციხეს 44.335 ლარის ზიანი მიადგა

სტიქიის შედეგების დასათვლელად ახალციხის მუნიციპალიტეტის გამგეობაში შექმნილი სამუშაო ჯგუფი ორ ნაწილად გაიყო და ოთხი დღის განმავლობაში შემთხვევის ადგილებზე მუშაობდა.

ერთ ჯგუფს ახალციხეში, რუსთაველის ქუჩის N103–ში, კორპუსის სახურავის გადახდის შედეგად მიყენებული ზარალისა და სოფლებში: მინაძესა და ჭაჭარაქში დაზიანებული გზების ხარჯთაღრიცხვის შესწავლა დაევალა, მეორე ჯგუფი კი ამავე სოფლებში სეტყვის შედეგად, სასოფლო – სამეურნეო სავარგულებისთვის მიყენებულ ზარალს სწავლობდა.

ზარალის შემსწავლელი სამუშაო ჯგუფის წევრის ნინო დემეტრაძის თქმით, სოფელ ღრელის სავარაუდო საკომპენსაციო ზარალი 2.392 ლარს შეადგენს, სოფელ ჭაჭარაქის – 7.016 ლარს, ხოლო ჭაჭარაქთან ახლოს არსებულ სასოფლო – სამეურნეო სავარგულებისთვის მიყენებული ზარალი 8.910 ლარია.

ასევე ზარალის შემსწავლელმა სამუშაო ჯგუფმა დაადგინა, რომ რუსთაველის ქუჩაზე მდებარე N103–ე კორპუსის გადასახურად 17.242 ლარია საჭირო, ხოლო სოფელ მინაძესა და ჭაჭარაქის გზების რეაბილიტაციისთვის 8.775 ლარი.

„მონაცემები მზადდება რეგიონული განვითარებისა და ინფრასტრუქტურის სამინისტროში გადასაგზავნად“, – ამბობს ნინო დემეტრაძე.

სამინისტროში მონაცემებს ხვალ გააგზავნიან, რის შემდეგაც ახალციხის მუნიციპალიტეტის სტიქიის შედეგებს უკვე სამინისტრო შეისწავლის.

შეგახსენებთ, რომ 6 ივლისს ახალციხეში ძლიერმა ქარმა და წვიმამ N103 კორპუსს სახურავის ნაწილი გადახადა. ამავე დღეს, ხევიდან ჩამოსულმა ქვა–ღორღმა ახალციხე–ახალქალაქის ცენტრალური მაგისტრალი ჩაკეტა, ძლიერმა სეტყვამ კი სასოფლო – სამეურნეო სავარგულები დააზიანა.

[მანანა სარაშვილი, ახალციხე]