ასპინძისა და ადიგენის სტიქიის შედეგებს რეგიონული განვითარების სამინისტრო სწავლობს

12 და 13 მაისს, ასპინძისა და ადიგენის მუნიციპალიტეტებს, სტიქიის შედეგად 1.478.723 ლარის ზარალი მიადგა. ყველაზე მეტი ასპინძის მუნიციპალიტეტმა იზარალა.

რეგიონული განვითარებისა და ინფრასტრუქტურის სამინისტროში ამბობენ, რომ მიღებული ზარალის შესახებ დოკუმენტაცია მიიღეს და სწავლობენ. იმ შემთხვევაში თუ დოკუმენტაციაში უზუსტობები არ იქნება, დასამტკიცებლად მთავრობის უახლოეს სხდომაზე გაიტანენ.

სამინისტროში განმარტავენ, რომ პირველ რიგში მუნიციპალიტეტებში ინფრასტრუქტურული პრობლემები უნდა მოწესრიგდეს. რაც შეეხება კერძო საკუთრებას, თანხის გაცემა კომპენსაციის სახით არ გაიცემა.

„ისეთი სახლებისთვის, რომლის აღდგენა სახელმწიფოს დახმარების გარეშე შეუძლებელია. გონიერების ფარგლებში გამოიყოფა თანხა. გამგეობას აქვს უფლება შეისყიდოს კონკრეტულად რაც სჭირდება და მოახდინოს რეაბილიტაცია, თუმცა ეს არ გულისხმობს, რომ საქონლის ან ფრინველის ზარალს აანაზღაურებს ვინმე. ეს ძალიან დიდ თანხებთან არის დაკავშირებული“, – ამბობს რეგიონული განვითარებისა და ინფრასტრუქტურის სამინისტროს საზოგადოებასთან ურთიერთობის სამსახურის უფროსი მაგდა პოპიაშვილი.

ასპინძის მუნიციპალიტეტში განმარტავენ , რომ 12 მაისის სტიქისს შედეგად ასპინძის მუნიციპალიტეტში ძირითადად ძროხის სადგომები დაზიანდა. იმ შემთხვევაში თუ მუნიციპალიტეტს თანხა საკმარისი ექნება, ადგილობრივებს მათ შეკეთებაში დაეხმარებიან.

ასპინძის მუნიციპალიტეტის ადგილობრივი ბიუჯეტიდან, სტიქიის შედეგების სალიკვიდაციოდ, სარეზერვო ფონდიდან 30.000 ლარი გამოიყო. აქედან, 10.000 ლარზე მეტი უკვე დაიხარჯა. თანხა ინფრასტრუქტურის აღდგენას მოხმარდა.

რაც შეეხება ადიგენის მუნიციპალიტეტს, აქ სტიქიას მოსახლეობის სახლებისთვის მნიშვნელოვანი ზარალი არ მიუყენებია. წვიმის დროს დაიტბორა რამდენიმე სახლი. მუნიციპალიტეტის საკრებულოში განმარტავენ, რომ მწირი ბიუჯეტის გამო თანხები არ გამოყოფილა.

[თინათინ ზაზაძე, ახალციხე]