ასპინძაში სტიქიით მიყენებული ზარალის ოდენობას ითვლიან

ასპინძის მუნიციპალიტეტის გამგეობაში აცხადებენ, რომ 12 მაისს მოსულმა ძლიერმა წვიმამ და სეტყვამ განსაკუთრებით სამი სოფელი დააზარალა: ოთა, ოშორა და დამალა. სტიქია უტევდა დაბასაც, თუმცა, აქ არ ყოფილა ისეთი ძლიერი სეტყვა, როგორც სოფლებში. დაბას პრობლემები სოფლებიდან წამოსულმა ნიაღვარმა შეუქმნა.

„ამ სოფლებში დაგროვილი წყალი წამოვიდა დაბა ასპინძაში. დამალის წყალმა ასპინძის სასაფლაოზე გადმოიარა და ასპინძაში სახლები დატბორა. ოთის წყალი კი ადიდდა და საერთაშორისო მნიშვნელობის გზა ჩაკეტა“, – განუცხადეს „სამხრეთის კარიბჭეს“ ასპინძის მუნიციპალიტეტის გამგეობაში.

ამ ეტაპზე ასპინძაში მოძრაობა აღდგენილია. დაბაში გაწმენდვითი სამუშაოები მიმდინარეობს. ადგილზე მობილიზებულია მძიმე ტექნიკა, პროცესში ჩართულია სამაშველო სამსახური.

სტიქიის გამო, ასპინძის მუნიციპალიტეტის გამგეობაში დღეს, 13 მაისს, დილიდან, საგანგებო სხდომა მიმდინარეობდა. სხდომაზე ოთხი სამუშაო ჯგუფი შეიქმნა. ჯგუფები სტიქიის ზონების მიხედვით გადანაწილდება. როგორც ასპინძის მუნიციპალიტეტის გამგეობაში აცხადებენ, კომისია შეეცდება ზარალის ოდენობის დადგენა მაქსიმუმ ერთ კვირაში დაასრულოს.

„ზარალი ძალიან დიდია“, – აცხადებენ გამგეობაში.

ასპინძაში დილიდან მუშაობს „სამხრეთის კარიბჭეს“ გადამღები ჯგუფი. რა ზარალი მიიღეს ადგილობრივებმა, დეტალურად დღის ბოლოს შემოგთავაზებთ.

იქამდე კი შეგიძლიათ იხილოთ, რა ხდებოდა გუშინ ასპინძაში:

ნიაღვრები დაბა ასპინძის ქუჩებში [Photo]
სტიქია ასპინძაში [Photo/Video]
ძლიერმა წვიმამ და სეტყვამ ასპინძის მუნიციპალიტეტი დააზარალა

[თამარ თოთაძე, ნინო ნარიმანიშვილი, ასპინძა]