ასპინძის შემდეგ სტიქიამ ადიგენს შეუტია

ასპინძისგან განსხვავებით, ადიგენში სტიქია დიდი მასშტაბის არ ყოფილა. ძლიერი წვიმა დაახლოებით 16:30 საათზე დაიწყო და 10 –15 წუთს გაგრძელდა. უხვი ნალექის შედეგად ადიგენში ნათესები და სახლები დაიტბორა.

წვიმამ სოფელ ჭელაში წყალგამტარი მილიც დააზიანა, მას ქვა-ღორღი დაეცო და წყალი ნაპირებზე გადმოვიდა. ადიგენის მუნიციპალიტეტის გამგებლის მოვალეობის შემსრულებლის ზაქარია ენდელაძის თქმით, ამის გამო ჭელაში ხიდი უმნიშვნელოდ დაზიანდა.

ენდელაძის განმარტებით, უხვმა ნალექმა ბოლაჯურში 2 საცხოვრებელი სახლი დატბორა. წყალს მოყოლილი ქვა-ღორღის გამო, სოფლებს: დიდ და პატარა სმადას შორის, ახალციხე-ადიგენის ცენტრალური მაგისტრალი ჩაიხერგა. ქვა-ღორღმა ჩაკეტა გზა სოფელ ღორთუბანშიც. აქ დაზიანდა ნათესებიც.

ადიგენის მუნიციპალიტეტის გამგეობაში ზარალის დამთვლელი კომისია უკვე შეიქმნა.

„ხვალ დილისთვის ზუსტი ინფორმაცია გვექნება იმის შესახებ სად რა დაზიანდა“, - ამბობს ენდელაძე.

მისი თქმით, სტიქიას არ შეუფერხებია მუნიციპალიტეტში ელექტროენერგიის მიწოდება. ამ დროისთვის აღდგენილია მოძრაობა ცენტრალურ მაგისტრალზეც.

[თამუნა უჩიძე, ადიგენი]