რელიგიური ნიშნით დისკრიმინაციის საქმეზე სააპელაციო იმსჯელებს

„ადამიანის უფლებების სწავლებისა და მონიტორინგის ცენტრი“ (EMC) მოხეში გამგებლის ყოფილი წარმომადგენლის თეიმურაზ მიქელაძის საქმეზე ახალციხის რაიონული სასამართლოს გადაწყვეტილების ბათილად ცნობს ითხოვს. მიქელაძე ადიგენის მუნიციპალიტეტის გამგეობის თანამშრომლებს რელიგიური ნიშნით დისკრიმინაციაში ადანაშაულებს.

EMC–ის წარმომადგენლების განცხადებით, ახალციხის რაიონული სასამართლოს გადაწყვეტილება, რომლის მიხედვითაც მიქელაძის სარჩელი არ დაკმაყოფილდა, დაუსაბუთებელია.

„მიუხედავად იმის რომ მოსარჩელეს წარდგენილი ჰქონდა საკმარისი მტკიცებულებები, რომელიც მიუთითებდნენ მოპასუხე მხარისგან დისკრიმინაციული გადაწყვეტილების მიღებაზე, მოსამართლემ არ გაიზიარა მოსარჩელე მხარის პოზიცია და უარი თქვა სარჩელის დაკმაყოფილებაზე“, – ამბობს მიქელაძის ადვოკატი ეთეტ გვრიტიშვილი.

მისი თქმით, ახალციხის რაიონული სასამართლოს გადაწყვეტილების დასაბუთება აჩვენებს, რომ სასამართლომ სწორად ვერ შეაფასა მოსარჩელის სასარჩელო მოთხოვნა.

„დავა მოსარჩელის მიმართ განხორციელებულ სავარაუდო დისკრიმინაციის ფაქტს ეხებოდა, თუმცა სასამართლოს გადაწყვეტილებაში არ აქვს გამოყენებული არც ერთი ის პროცედურული ნორმა, რომელიც გამოიყენება დისკრიმინაციასთან დაკავშირებული საქმეების განხილვისას“, – აცხადებს გვრიტიშვილი და ამატებს, რომ სასამართლოს გადაწყვეტილებაში არ არის შეფასებული არც ერთი ის ფაქტობრივი გარემოება, რომელიც მოსარჩელის აზრით მიუთითებდა მის მიმართ განხორციელებულ დისკრიმინაციაზე.

გვრიტიშვილი ირწმუნება, რომ სასამართლომ ასევე, არასწორად გაანაწილა მხარეთა შორის მტკიცების ტვირთი: „ნაცვლად იმისა, რომ კანონმდებლობის შესაბამისად მოსამართლეს შეეფასებინა თუ რამდენად შეძლო მოპასუხე მხარემ მისი არგუმენტებისა და წარმოდგენილი მტკიცებულების საფუძველზე, მისი მხრიდან განხორციელებული სავარაუდო დისკრიმინაციის ფაქტის გაქარწყლება, მან აღნიშნული ტვირთი კანონმდებლობის საწინააღმდეგოდ მთლიანად მოსარჩელე მხარეს დააკისრა“.

შეგახსენებთ რომ, თეიმურაზ მიქელაძე, მოხის ცნობილი მოვლენების დროს, ამავე სოფელში გამგებლის წარმომადგენლის მოვალეობას ასრულებდა. ამ დღეს იგი სისხლის სამართლის წესით დააკავეს და როგორც თავად აცხადებს, პოლიციამ იგი სასტიკად სცემა. ასევე, თეიმურაზ მიქელაძემ საჯაროდ გააპროტესტა შინაგან საქმეთა სამინისტროს გადაწყვეტილება, სოფელ მოხეში გახსნილი პოლიციის განყოფილების უფროსად გელა კოხოძის დანიშვნის შესახებ.

მოგვიანებით კი ადიგენის მუნიციპალიტეტის გამგეობაში საჯარო მოხელეთა შესარჩევი კონკურისის შემდეგ მას მოხეს რწმუნებულად დანიშნვნაზე უარი განუცხადეს. „ადამიანის უფლებების სწავლებისა და მონიტორინგის ცენტრი“ ამტკიცებს, რომ თეიმურაზ მიქელაძის მიმართ დისკრიმინაციულ მოპყრობას ჰქონდა ადგილი.

[თამუნა უჩიძე, ახალციხე]