ადიგენის გამგეობას დისკრიმინაციული მოპყრობის გამო სასამართლოში უჩივლეს

„ადამიანის უფლებების სწავლებისა და მონიტორინგის ცენტრმა“ საჩივარი ახალციხის რაიონულ სასამართლოში შეიტანა. ორგანიზაცია ამტკიცებს, რომ ადიგენის მუნიციპალიტეტის სოფელ მოხეში გამგებლის ყოფილი წარმომადგენლის თეიმურაზ მიქელაძის მიმართ დისკრიმინაციულ მოპყრობას ჰქონდა ადგილი.

„ადამიანის უფლებების სწავლებისა და მონიტორინგის ცენტრის“ წარმომადგენლის თამთა მიქელაძის თქმით, ეს რამდენიმე არგუმენტით დასტურდება. ერთ–ერთი თეიმურაზ მიქელაძესა და ადიგენის მუნიციპალიტეტის გამგებლის მოადგილეს მინდია ჯელიას შორის შემდგარი შეხვედრაა. ამ შეხვედრაზე ჯელიამ მიქელაძეს მოხეში სადავო შენობასთან დაკავშირებულ ინცინდენტში მონაწილეობასა და ასევე, მოხეში პოლიციის განყოფილების უფროსად გელა კოხოძის დანიშვნის შესახებ გაკეთებულ განცხადებებზე მიანიშნა.

„სოფელში რწმუნებულები იგივე დატოვეს და თეიმურაზ მიქელაძე შეცვალეს. მის ნაცვლად დაბალი კვალიფიკაციის მქონე პირი დანიშნეს. ამიტომ, გამგეობას თავის მართლება გაუჭირდება“, – აცხადებს თამთა მიქელაძე.

„ადამიანის უფლებების სწავლებისა და მონიტორინგის ცენტრის“ სასარჩელო მოთხოვნა საჯარო მოხელეთა კონკურსზე თეიმურაზ მიქელაძის შეფასების ოქმებისა და დოკუმენტების ბათილად ცნობა, ასევე გასაუბრების ხელახლა ჩატარებაა.

ახალციხის რაიონულ სასამართლოში საჩივარი პირველ მაისს შეიტანეს. ასევე დააყენეს შუამდგომლობა, რომ ადიგენის მუნიციპალიტეტის გამგეობიდან მიქელაძის საქმესთან დაკავშირებული დოკუმენტები გამოითხოვონ.

„დიდი ხნის წინ მივმართეთ ადიგენის გამგეობას და დოკუმენტები გამოვითხოვეთ, მაგრამ ამ დრომდე ვერ მივიღეთ. ამიტომ გასაჩივრების ვადები რომ არ დაგვერღვია, სასამართლოში საჩივარი შევიტანეთ და ამ დოკუმენტების გამოსათხოვად შუამდგომლობა დავაყენეთ“, – გვიხსნის თამთა მიქელაძე.

შეგახსენებთ რომ, თეიმურაზ მიქელაძე, მოხის ცნობილი მოვლენების დროს, ამავე სოფელში გამგებლის წარმომადგენლის მოვალეობას ასრულებდა. ამ დღეს იგი სისხლის სამართლის წესით დააკავეს და როგორც თავად აცხადებს, პოლიციამ იგი სასტიკად სცემა. ასევე, თეიმურაზ მიქელაძემ საჯაროდ გააპროტესტა შინაგან საქმეთა სამინისტროს გადაწყვეტილება, სოფელ მოხეში გახსნილი პოლიციის განყოფილების უფროსად გელა კოხოძის დანიშვნის შესახებ.

[თამუნა უჩიძე, ახალციხე]