რელიგიური ნიშნით დისკრიმინაციის საქმეზე სამი მოწმე დაიკითხა

მოხეში მცხოვრებმა მუსლიმებმა 22 ოქტომბერს სადავო შენობის გამო შექმნილი კონფლიქტი გაიხსენეს. მათ სასამართლო დარბაზში პოლიციის მხრიდან თეიმურაზ მიქელაძის მიმართ არაპროპორციული ძალის გამოყენების ფაქტები დაადასტურეს.

„რაც ყველაზე მნიშვნელოვანი იყო, შეკითხვაზე: იცნობენ თუ არა ადიგენის მუნიციპალიტეტის მასშტაბით რომელიმე მუსლიმს, რომელიც ნებისმიერ საჯარო სამსახურში მუშაობს, განაცხადეს რომ არა. ბუნებრივია, აქ არ იგულისხმება გამგებლის ორი მუსლიმი წარმომადგენელი.
ადიგენის გამგეობაში მხოლოდ ეს ორი მუსლიმი მუშაობს“, – ამბობს თეიმურაზ მიქელაძის ინტერესების დამცველი თამთა მიქელაძე.

სასამართლოში, ასევე, ჩვენება მისცა მოპასუხე მხარის მოწმემ, საჯარო მოხელეთა შესარჩევი საკონკურსო კომისიის ერთ–ერთმა წევრმა ნოდარ ბაღდოშვილმა. თუმცა, მან დეტალების გახსენება იმის შესახებ, თუ რატომ არ შეარჩიეს მოხეში გამგებლის წარმომადგენლად თეიმურაზ მიქელაძე და უპირატესობა გიორგი მეტრეველს მიანიჭეს, ვერ შეძლო.

მომავალი სასამართლო სხდომა 24 აგვისტოს 14:00 საათზე გაიმართება.

შეგახსენებთ რომ, თეიმურაზ მიქელაძე, მოხის ცენტრში მდებარე სადავო შენობის თემაზე დაწყებული დაპირისპირების დროს, ამავე სოფელში გამგებლის წარმომადგენლის მოვალეობას ასრულებდა. ამ დღეს იგი სისხლის სამართლის წესით დააკავეს და როგორც თავად აცხადებს, პოლიციამ სასტიკად სცემა. ასევე, თეიმურაზ მიქელაძემ საჯაროდ გააპროტესტა შინაგან საქმეთა სამინისტროს გადაწყვეტილება, სოფელ მოხეში გახსნილი პოლიციის განყოფილების უფროსად გელა კოხოძის დანიშვნის შესახებ.

მოგვიანებით კი ადიგენის მუნიციპალიტეტის გამგეობაში საჯარო მოხელეთა შესარჩევი კონკურისის შემდეგ მას მოხეს რწმუნებულად დანიშვნაზე უარი განუცხადეს. „ადამიანის უფლებების სწავლებისა და მონიტორინგის ცენტრი“ ამტკიცებს, რომ თეიმურაზ მიქელაძის მიმართ დისკრიმინაციულ მოპყრობას ჰქონდა ადგილი.

[თამუნა უჩიძე, ახალციხე]