საქმე, რომელშიც საჯარო მოხელეებს მუსლიმის მიმართ დისკრიმინაციულ მოპყრობაში ადანაშაულებენ

ახალციხის რაიონულ სასამართლოში მოხეში მცხოვრები მუსლიმის თეიმურაზ მიქელაძის საქმეზე მოსამზადებელი სხდომა უკვე გაიმართა. მოსარჩელე მხარეს მოსამართლე გიორგი ლონდარიძემ შუამდგომლობები დაუკმაყოფილა.

მიქელაძის ინტერესების დამცველის, „ადამიანის უფლებების სწავლებისა და მონიტორინგის ცენტრის“ წარმომადგენლის თამთა მიქელაძის განცხადებით, მოსარჩელე მხარემ სასამართლოში ის შუამდგომლობები წარადგინა, რომლებიც მათ შესაძლებლობას მისცემს ამტკიცონ, რომ თეიმურაზ მიქელაძის ნაწილში ადიგენის მუნიციპალიტეტის გამგეობის მიერ მიღებული გადაწყვეტილება იყო დისკრიმინიაციული. მიქელაძის განცხადებით, ადიგენის გამგეობაში მიღებული ეს გადაწყვეტილება, იყო იმ პოლიტიკის გაგრძელება, რომელსაც მანამდე ადგილობრივი ხელისუფლება მუსლი თემის მიმართ ატარებდა.

„ეს ეხება ძირითადად მოხეში განვითარებულ მოვლენებს აქ არსებულ სადავო საკულტო ნაგებობასთან დაკავშირებით“, – აცხადებს თამთა მიქელაძე.

მოსარჩელე მხარემ, ასევე მოითხოვა სახალხო დამცველის აპარატისა და არასამთავრობო ორგანიზაციების წარმომადგენლების დაკითხვა, რომლებიც 22 ოქტომბერს თეიმურაზ მიქელაძის მიმართა პოლიციის ქცევის კანონიერებას შეაფასებენ. „ასევე, ისაუბრებენ იმის შესახებ, თუ რა ტიპის განცხადებებს აკეთებდნენ და რა ტიპის მიდგომას აფიქსირებდნენ ადგილობრივი ხელისულფებსი წარმოადგენლები მუსლიმ თემთან დაკავშირებით“, – ამბობს თამთა მიქელაძე.

მისი განმარტებით, მოწმის სახით დაიკითხებიან მოხეში მცხოვრები მუსლიმები, რომლებიც დაადასტურებენ, რომ 22 ოქტომბერს თეიმურაზ მიქელაძე უკანონოდ დააკავეს.

ასევე, სასამართლოში ისაუბრებენ სამცხე–ჯავახეთის გუბერნატორის აკაკი მაჭუტაძის მხრიდან მუსლიმების მიმართ მოპყრობის ფაქტზე. პროცესზე ჩვენებას მისცემს ის მუსლიმი, რომელიც ისაუბრებს გუბენრატორისა და მუსლიმი თემის შეხვედრაზე და დაადასტურებს იმას, რომ აკაკი მაჭუტაძემ უმცირესობის მიმართ ღირსების შემლახავი ენა გამოიყენა.

სასამართლოში მოსარჩელე მხარე დაკითხავს იმ მუსლიმსაც, რომელსაც ისევე, როგორც თეიმურაზ მიქელაძეს, ადიგენის მუნიციპალიტეტის გამგეობაში საჯარო მოხელეთა შესარჩევი კონკურსის შემდეგ დასაქმებაზე უარი უთხრეს: „მალხაზ ხოზრევანიძეს, ისევე კარგი მონაცემები ჰქონდა, როგორც განათლების, ასევე, სამუშაო გამოცდილების თვალსაზრისით, როგორც მიქელაძეს, მაგრამ იმიტომ რომ მუსლიმია, დასაქმებაზე უარი უთხრეს“.

რაც შეეხება მოპასუხე მხარეს, ადიგენის მუნიციპალიტეტის გამგეობის წარმომადგენლის გიორგი ახალკაცის შუამდგომლობის თანახმად, სასამართლოში ადიგენის მუნიციპალიტეტის გამგებლის მოადგილე, მინდია ჯელია დაიკითხება.

გიორგი ახალკცახის განცხადებით, მოსამართლემ, ასევე, დააკმაყოფილა მისი შუამდგომლობა საქმეში მოხეს რწმუნებულის გიორგი მეტრეველის მესამე პირად ჩართვაზე: „თეიმურაზ მიქელაძე კონკურსის გამოცხადებამდე მოვალეობის შემსრულებლად სწორედ ამ პოზიციაზე მუშაობდა“.

თეიმურაზ მიქელაძის საქმეზე მოსამზადებელი სხდომა 24 ივნისს ჩატარდა. მთავარი სხდომა კი 8 ივლისს 16:00 საათზე გაიმართება.

შეგახსენებთ რომ, თეიმურაზ მიქელაძე, მოხის ცნობილი მოვლენების დროს, ამავე სოფელში გამგებლის წარმომადგენლის მოვალეობას ასრულებდა. ამ დღეს იგი სისხლის სამართლის წესით დააკავეს და როგორც თავად აცხადებს, პოლიციამ იგი სასტიკად სცემა. ასევე, თეიმურაზ მიქელაძემ საჯაროდ გააპროტესტა შინაგან საქმეთა სამინისტროს გადაწყვეტილება, სოფელ მოხეში გახსნილი პოლიციის განყოფილების უფროსად გელა კოხოძის დანიშვნის შესახებ.

მოგვიანებით კი ადიგენის მუნიციპალიტეტის გამგეობაში საჯარო მოხელეთა შესარჩევი კონკურისის შემდეგ მას მოხეს რწმუნებულად დანიშნვნაზე უარი განუცხადეს. „ადამიანის უფლებების სწავლებისა და მონიტორინგის ცენტრი“ ამტკიცებს, რომ თეიმურაზ მიქელაძის მიმართ დისკრიმინაციულ მოპყრობას ჰქონდა ადგილი.

[თამუნა უჩიძე, ახალციხე]