სტრასბურგის სასამართლომ მოხეს საქმის განხილვა დაასრულა

სტრასბურგის სასამართლომ „ადამიანის უფლებების სწავლებისა და მონიტორინგის ცენტრის“ (EMC) სარჩელი განიხილა. საქმე ადიგენში, სოფელ მოხეში ოთხი მუსლიმი პირის მიმართ პოლიციის მიერ სავარაუდო ძალის გადამეტებისა და არასათანადო მოპყრობის ფაქტებს ეხება.

„სასამართლომ საქართველოს მთავრობასთან კომუნიკაცია და საქმის განხილვა უკვე დაასრულა, ახლა გადაწყვეტილებას ველოდებით, თუმცა როდის იქნება ცნობილი არ ვიცით“, – ამბობს „ადამიანის უფლებების სწავლებისა და მონიტორინგის ცენტრის“ იურისტი თამთა მიქელაძე.

შეგახსენებთ, რომ EMC დავობს მშვიდობიანი შეკრების მონაწილე ოთხი მუსლიმი პირის მიმართ პოლიციის მიერ სავარაუდო ძალის გადამეტებისა და არასათანადო მოპყრობის ფაქტებზე. ორგანიზაცია განმცხადებლების მიმართ ევროპული კონვენციის მე-3 (წამების, არაადამიანური და ღირსების შემლახავი მოპყრობის აკრძალვა), მე-8 (პირადი და ოჯახური ცხოვრების ხელშეუხებლობის უფლება), მე-14 (დისკრიმინაციის აკრძალვა) და მე-13 (უფლება სამართლებრივი დაცვის ეფექტიან საშუალებებზე) მუხლების დარღვევას ამტკიცებს.

[თამუნა უჩიძე, ადიგენი]