მუსლიმების აქციას სრულიად საქართველოს მუფთის მოადგილე ესწრება [Video]

ადამ შანთაძემ „სამხრეთის კარიბჭეს“ განუცხადა, რომ სამცხე–ჯავახეთის გუბერნატორს აკაკი მაჭუტაძეს მოხეში მიმდინარე მოვლენებზე ესაუბრა და მიიღო დაპირება, რომ ყველა დაკავებულს გაათავისუფლებენ.

მისივე თქმით, ადგილობრივი ხელისუფლების პოზიციით, მოხეში შენობის მშენებლობა იგივე მიმართულებით უნდა გაგრძელდეს. ეს პოზიცია ადამ შანთაძემ აქციაზე შეკრებლებსაც გააცნო.

„სამხრეთის კარიბჭეს“ კითხვაზე, როგორ ფიქრობს, როგორ უნდა გადაწყდეს შენობის საკითხი, მუფთის მოადგილემ განაცხადა, რომ თბილისში დაბრუნების შემდეგ ამ საკითხზე მეჯლისზე იმსჯელებენ: „ყველაფერი უნდა გადაწყდეს მშვიდობიანი დიალოგის გზით“.

ადამ შანთაძეს ადგილობრივებმა წინასაარჩევნოდ ჯემალ პაქსაძის დაპირება გაახსენეს შენობის გადაცემაზე. შანთაძემ განაცხადა, რომ ეს ფაქტი მისთვის უცნობია და დაბრუნებული ჯემალ პაქსაძეს მოახსენებს. მისივე თქმით, დღეს ახალციხეში პაქსაძეც უნდა ჩამოსულიყო, თუმცა, ჯანმრთელობის მდგომარეობის გამო ვერ შეძლო.

რაც შეეხება, ადგილობრივი მუსლიმების უნდობლობას ჯემალ პაქსაძის მიმართ, შანთაძემ აღნიშნა, რომ ყველას აქვს უფლება ჰქონდეს თავისი აზრი: „ჩვენ ნებისმიერი მუსლიმის აზრს ვითვალისწინებთ. დაპირების შესახებ აქ შემახსენეს და ამ პოზიციის შესახებ მოვახსენებ ხელმძღვანელს. უნდობლობა არ ნიშნავს, რომ მუფთი აქ ვეღარ ჩამოვა, შეხვედრა შედგება და ყველა მოახსენებს თავის პოზიციას, არგუმენტირებულად“.



კითხვაზე, რას ურჩევს მუსლიმებს, უნდა შეწყვიტონ თუ არა აქცია, მითუმეტეს როცა დაპირდნენ, რომ ყველა დაკავებულს გაათავისუფლებენ, შანთაძემ განაცხადა, რომ გაესაუბრება აქციის მონაწილეებს და როგორც ისინი გადაწყვეტენ, ისე მოიქცევა.

აქციის მონაწილეები ამბობენ, რომ ისინი სრულიად საქართველოს მუფთს უნდობლობას უცხადებენ, შესაბამისად, მის რჩევას ვერც მიიღებენ და დაშლას არ აპირებენ. აქციის მონაწილეებმა კოცონი აანთეს და სამმართველოს შენობასთან რჩებიან.

პარალელურად, ახალციხის რაიონულ სასამართლოში ადმინისტრაციული წესით დაკავებული 11 მუსლიმის სასამართლო პროცესი მიმდინარეობს.

შეგახსენებთ, დაპირისპიება მოხეში გუშინ, 22 ოქტომბერს დაიწყო. სამართალდამცველებმა 14 მუსლიმი დააკავეს. მათი დაკავების გამო ადიგენის მუსლიმური თემი ორი დღეა ახალციხეში, შსს სამხარეო მთავარი სამმართველოს შენობასთან აქციებს მართავს. 14–დან 3 დაკავებული, უკვე გაათავისუფლეს. რამდენიმე წუთის წინ მათ ავტომობილით სამმართველოს შენობას ჩაუარეს და აქციის მონაწილეებს მიესალმნენ. მათ განაცხადეს, რომ სახლში ბრუნდებიან.



[თამუნა უჩიძე, ნინო ნარიმანიშვილი, ახალციხე]