ადიგენში მცხოვრები მუსლიმები ჯემალ პაქსაძის გადადგომის მოთხოვნით ხელმოწერების შეგროვებას იწყებენ

მთავარი → 20.10.2014

საქართველოს მუფთის უფლებამოსილების შეწყვეტის მიზნით, სამცხე–ჯავახეთის მუსლიმთა საზოგადოება ხელმოწერების შეგროვებას იწყებს.

ადიგენში მცხოვრები მუსლიმები ჯემალ პაქსაძის გადადგომის მოთხოვნით ხელმოწერების შეგროვებას იწყებენ

აღნიშნულის შესახებ ინფორმაციას ჭელის მეჩეთის წინამძღვარი ჯამბულ აბულაძე ავრცელებს.

"უახლოეს დღეებში იწყება ხელმოწერების შეგროვება მუფთის გადადგომის მოთხოვნით. ჯემალ პაქსაძეს სამცხე–ჯავახეთის მუსლიმთა საზოგადოება, ყველა ერთად ვუცხადებთ უნდობლობას. პაქსაძემ ჩვენც მოგვატყუა და სახელმწიფოც, ჩვენ ამას ვეღარ ავიტანთ და აღარ დავუშვებთ", – აცხადებს ჯამბულ აბულაძე.

შეგახსენებთ, რომ მუსლიმი სასულიერო პირები ერთმანეთს ადიგენის მუნიციპალიტეტის სოფელ მოხეში არსებული მეჩეთის გამო დაუპირისპირდნენ.ჯამბულ აბულაძის განმარტებით, ჯემალ პაქსაძე მუსლიმ მოსახლეობას ადგილობრივი თვითმმართველობის არჩევნების წინ აღნიშნული სადავო შენობის გადაცემას დაპირდა, სწორედ ეს გახდა 18 ოქტომბერს მუსლიმი და ქრისტიანი მოსახლეობის დაპირისპირების მიზეზი.

"სამხრეთის კარიბჭე" სრულიად საქართველოს მუფთთან ჯემალ პაქსაძესთან დაკავშირებას მთელი დღის განმავლობაში ცდილობდა, თუმცა პაქსაძე ზარებს არ პასუხობდა.

[თინათინ ზაზაძე, ადიგენი]