მუფთის განცხადებას ყოფილი მეჩეთის შენობის გადაცემაზე ადიგენის ახალი საკრებულო განიხილავს

ამის შესახებ ადიგენის მუნიციპალიტეტის გამგეობამ სრულიად საქართველოს მუფთს ჯემალ პაქსაძეს უკვე აცნობა.

„არჩევნების შემდეგ მოგვწერეს, რომ განცხადებას მას შემდეგ განიხილავენ, რაც ახალი საკრებულო შედგება, - განაცხადა ჯემალ პაქსაძემ „სამხრეთის კარიბჭესთან“ სატელეფონო საუბარში და დაამატა - ასევე გვწერენ, რომ განცხადება განხივლის სტადიაშია“.

ადიგენის მუნიციპალიტეტის ზაქარია ენდელაძის განცხადებით, ახალი საკრებულოს სხდომა 14 ივლისს შედგება: „ამ დროსითვის ჯერ გადაწყვეტილი არაა ამ განცხადებას ახალი საკრებულო განიხილავს თუ ძველი, ამიტომ გადაჭრით არაფრის თქმა არ შემიძლია“.

ადიგენის მუნიციპალიტეტის საკრებულოს თავმჯდომარე ემზარ ენდელაძე აცხადებს, რომ აღნიშნული განცხადება საკრებულოში ჯერ არ შესულა: „დღესაც რომ შემოვიდეს 2-3 დღეში ლეგიტიმაცია გვიწყდება, განხილვას თავისი პროცედურები აქვს და ამიტომ 3 დღეში მისი განხილვა მაინც ვერ მოესწრება. თან ეს სახუმარო საკითხი არაა“.

ჯემალ პაქსაძის განცხადებით, მუსლიმები ყოფილი მეჩეთის შენობების გადაცემას არა მარტო მოხეში, არამედ საქართველოს სხვა კუთხეებშიც ითხოვენ: „მთავარი არის ის, რომ ქვეყანაში უკვე ჩამოყალიბდა პრემიერმინისტრს დაქვემდებარებული რელიგიების სააგენტო, ამ საკითხებს ცენტრალურ ხელისუფლებასთან ერთად ეტაპობრივად მოვაგვარებთ“.

კითხვაზე, თუ რამდენი ყოფილი მეჩეთის შენობის გადაცემას ითხოვენ მუსლიმები პაქსაძე გვპასუხობს: „არის რამდენიმე ასეთი, ხელისუფლებასთან ამ საკითხზე ვმუშაობთ და ეს ინფომარიცა საჯარო მოგვიანებით გახდება“.

შეგახსენებთ, რომ მოხეში, არჩევნებამდე რამდენიმე დღით ადრე გამგებლობის კანდიდატი „ქართული ოცნებიდან“ ზაქარია ენდელაძე და სრულიად საქართველოს მუფთი ჯემალ პაქსაძე მუსლიმ თემს ყოფილი მეჩეთის შენობის გადაცემას დაჰპირდნენ.

ამ სოფელში ადგილობრივი თვითმმართველობის არჩენვები „ქართულმა ოცნებამ“ მოიგო.

[თამუნა უჩიძე, ახალციხე]